2023 yilda byudjetdan ajratilgan subsidiyalar miqdori 29 trln 255 mlrd soʻmni tashkil qilgan

 2023 yil yakunlariga koʻra, davlat byudjetidan ajratiladigan subsidiyalar miqdori 29 trln 255 mlrd soʻmni tashkil qilgan. Bu haqda Iqtisodiyot va moliya vazirligi eʼlon qilgan. Ajratilgan subsidiyalar  2021 yilda 5 trln 629,8 mlrd soʻm, 2022 yilda esa 12 trln 260,9 mlrd soʻm miqdorni tashkil qilgan. 2023 yilda subsidiyalar miqdori rekord darajada oshib, 2021 yilga nisbatan 5,2 barobarga, 2022 yilga nisbatan 2,4 barobarga koʻpaygan. 

Oʻtgan yili ajratilgan subsidiyalarning katta qismi quyidagi maqsadlarda yoʻnaltirilgan:   

 ichki bozorda tabiiy gazni ulgurji sotib olish va sotish oʻrtasidagi zararlarni qoplash – 17,99 trln soʻm;

 nodavlat maktabgacha taʼlim muassasalariga subsidiyalar – 2,74 trln soʻm;

issiqlik taʼminoti korxonalari zararini qoplash xarajatlari – 1,72 trln soʻm;

aholi tomonidan uy-joy sotib olish uchun subsidiyalar – 1,1 trln soʻm;

qishloq xoʻjaligi jamgʻarmasiga subsidiyalar – 848 mlrd soʻm;

jamoat transportida yoʻlovchilar tashish uchun subsidiyalar – 838 mlrd soʻm;

chorvachilik, parrandachilik, baliqchilik xoʻjaliklari tomonidan yetishtirib sotilgan mahsulot uchun subsidiyalar – 603 mlrd soʻm.