Yoshlarga til oʻrganishi uchun subsidiya ajratiladi

Dastur mohiyati

"2+6" dasturiga koʻra, belgilangan xorijiy tillar boʻyicha minimal darajadagi sertifikatga ega boʻlgan yoshlar 8 oylik oʻqish dasturida ishtirok etishi mumkin.

Birinchi 2 oy ariza beruvchi tomonidan oʻz hisobidan toʻlanadi;

Keyingi 6 oy Yoshlar ishlari agentligi huzuridagi Yoshlarga oid davlat siyosatini qoʻllab-quvvatlash jamgʻarmasi hisobidan subsidiya bilan qoplanadi.

Subsidiya miqdori har oy yakunida quyidagicha belgilanadi:

Toshkent shahrida BHMning 2 baravarigacha;

Qoraqalpogʻiston Respublikasi va viloyat markazlarida BHMning 1,5 baravarigacha;

tuman va shaharlarda BHMning 1 baravarigacha.

Amal qilish muddati

2025–2026 yillarda 20 ming nafargacha yoshlar subsidiya oladi;

2031 yilgacha har yili 20 ming nafargacha yoshlar dasturdan foydalanishi rejalashtirilgan.

Agar tegishli yilda 20 ming nafardan ortiq yosh subsidiya olsa, keyingi ajratmalar navbatdagi yilgacha toʻxtatiladi.

Subsidiya ajratiladigan oʻquv markazlar uchun talablar:

belgilangan tartibda elektron platforma orqali roʻyxatdan oʻtgan boʻlishi;

oʻquv mashgʻulotlarini kunlik elektron nazorat qilish imkoniyatiga ega tizimga integratsiya qilingan boʻlishi lozim.