2023 йилда бюджетдан ажратилган субсидиялар миқдори 29 трлн 255 млрд сўмни ташкил қилган

 2023 йил якунларига кўра, давлат бюджетидан ажратиладиган субсидиялар миқдори 29 трлн 255 млрд сўмни ташкил қилган. Бу ҳақда Иқтисодиёт ва молия вазирлиги эълон қилган. Ажратилган субсидиялар  2021 йилда 5 трлн 629,8 млрд сўм, 2022 йилда эса 12 трлн 260,9 млрд сўм миқдорни ташкил қилган. 2023 йилда субсидиялар миқдори рекорд даражада ошиб, 2021 йилга нисбатан 5,2 баробарга, 2022 йилга нисбатан 2,4 баробарга кўпайган. 

Ўтган йили ажратилган субсидияларнинг катта қисми қуйидаги мақсадларда йўналтирилган:   

 ички бозорда табиий газни улгуржи сотиб олиш ва сотиш ўртасидаги зарарларни қоплаш – 17,99 трлн сўм;

 нодавлат мактабгача таълим муассасаларига субсидиялар – 2,74 трлн сўм;

иссиқлик таъминоти корхоналари зарарини қоплаш харажатлари – 1,72 трлн сўм;

аҳоли томонидан уй-жой сотиб олиш учун субсидиялар – 1,1 трлн сўм;

қишлоқ хўжалиги жамғармасига субсидиялар – 848 млрд сўм;

жамоат транспортида йўловчилар ташиш учун субсидиялар – 838 млрд сўм;

чорвачилик, паррандачилик, балиқчилик хўжаликлари томонидан етиштириб сотилган маҳсулот учун субсидиялар – 603 млрд сўм.