Afgʻonistonda olib kelingan katta miqdordagi narkotik moddalar toʻxtatib qolindi

Xususan, muqaddam narkokurerlar tomonidan Afgʻonistondan kontrabanda yoʻli bilan Surxondaryo viloyati hududiga olib oʻtilgan va Fargʻonaning Yozyovon tumaniga keltirilib, dala maydonidagi xufiya joyga yashirib koʻyilgan 9 kg 896 gr “gashish” moddasini qabul qilib olgan vaqtlarida Margʻilon shahrida yashovchi, 1983 y.t. xususiy tadbirkor va uning 1989 y.t. jinoiy sherigi ashyoviy dalillar bilan ushlandi.

Shuningdek, voqea joyidan qochishga uringan xususiy tadbirkorning yonida boʻlgan 14 ming 500 AQSh dollari va 6 mln. 250 ming soʻm ham protsessual tartibda rasmiylashtirib olindi.

Tergovga qadar tekshiruv davomida, ushbu noqonuniy ishga aloqador boʻlgan uchinchi shaxsning yashash xonadonidan esa 110 gr. “opiy” moddasi, 2 ta elektron tarozi, 1200 AQSh dollari hamda 28 mln. soʻm protsessual tartibda rasmiylashtirib olindi.

Taʼkidlash lozimki, ushbu ajal ogʻusi Fargʻona vodiysidagi isteʼmolchilarga sotilishi kerak boʻlgan.

Afgʻoniston yoʻnalishida narkotik moddalar kontrabandasiga qarshi kurashish doirasida Davlat xavfsizlik xizmati organlari xodimlari tomonidan yana bir tezkor tadbir oʻtkazildi.

Jumladan, Qoraqalpogʻiston Respublikasi Toʻrtkoʻl tumanida yashovchi, 1963 y.t., muqaddam narkotik moddalar savdosi bilan bogʻliq jinoyati uchun sudlangan shaxs Xorazm viloyati Xazorasp tumanida istiqomat qiluvchi, 1978 y.t. fuqaro bilan oʻzaro til biriktirib, kelgusida sotib, moʻmay daromad topish maqsadida afgʻonistonlik narkosavdogarlarga katta miqdordagi giyohvandlik vositasini buyurtma berishadi.

Oʻz navbatida narkokurerlar tomonidan ajal ogʻusi Afgʻonistondan Surxondaryo viloyati hududiga olib oʻtilib, keyinroq Toʻrtkoʻl tumanidagi xufiya joyga qoldirib ketiladi.

Oʻtkazilgan tezkor tadbirda Toʻrtkoʻl va Xazorasplik mazkur shaxslar xufiya joydan 6 kg 149 gr “opiy” moddasini va 9 kg 814 gr koʻknori somonini olgan vaqtlarida ashyoviy dalillar bilan ushlandi.

Hozirda ularga nisbatan Jinoyat kodeksining 28,246-moddasi 2-qismi va 273-moddasi 5-qismi bilan jinoyat ishi qoʻzgʻatilib, “qamoq” ehtiyot chorasi qoʻllanildi.

Hozirda mazkur shaxslarning barchasiga nisbatan Jinoyat kodeksining 246 va 273-moddalari bilan jinoyat ishlari qoʻzgʻatilib, “qamoq” ehtiyot chorasi qoʻllanildi.

Tergov harakatlari doirasida ularning jinoiy aloqalarini aniqlash boʻyicha zarur chora-tadbirlar koʻrilmoqda.