«Sudda jabrlanuvchi emas, aybdorga oʻxshayman» — IIB xodimi kaltaklagan maktab direktori Saida Mirziyoyevaga videomurojaat yoʻlladi

«Men jabrlanuvchi emas, xuddi sudlanuvchiga oʻxshayman»

Qosimova "Sirojiddin Media"ga bergan videomurojaatida sud jarayoni yopiq oʻtkazilayotgani va jurnalistlar kiritilmayotganidan shikoyat qildi. Uning soʻzlariga koʻra, har gal ochiqlik talab qilganida, «ishda maxfiy maʼlumotlar bor» degan bahona keltirilayotgan.

«Men sudda gapirolmayman, hatto oʻz fikrimni bildirishga ham taqiq qoʻyilgan. Sudda jabrlanuvchi sifatida emas, xuddi jinoyatchi sifatida munosabat boʻlyapti», — deydi u.

Guliraʼno Qosimova sudyaga koʻp marta eʼtiroz bildirgani uchun suddan haydalganini aytadi. Uning taʼkidlashicha, sudda ichki ishlar xodimlarining advokatlari erkin gapira oladi, ammo jabrlanuvchi tarafning advokatlariga cheklovlar qoʻyilgan.

«Oliy sud shunchaki oʻsha kamera yozuvlarini koʻrsin — u yerda nimalar boʻlayotganini tushunadi. Sudda menga nisbatan haqoratlar ham boʻldi. Men adolat soʻraganim uchun jazolanmoqdaman», — deydi u.

«IIB xodimlarining talabi bilan sud yopiq oʻtkazilyapti»

Ayolning taʼkidlashicha, sud yopiq tarzda oʻtishini ayni shu ishda ayblanayotgan IIB xodimlari va ularning advokatlari soʻragan.

«Agar sud ochiq boʻlsa, xalq haqiqatni koʻradi. Men oʻzim ommaviy axborot vositalari kirishini xohlayapman. Lekin ularning shaʼnini saqlash bahonasida eshiklar yopilyapti. Axir tahqirlangan men-ku!», — deydi Qosimova.

Uning aytishicha, sud jarayonida guvohlar va ayblanuvchilar bir-biriga yaqin oʻtirib, bir-biri bilan maslahatlashib olayotgan holatlar kuzatilgan.

«Bu holatlar menda shubha uygʻotmoqda. Shuning uchun ishni Oliy sud koʻrib chiqsin, ochiq tarzda oʻtkazilsin», — deya talab qiladi u.

«Meni urganlar jazo olmaguncha ortga qaytmayman»

Qosimova tergov paytida oʻzini tahdidlar bilan qoʻrqitishganini aytadi.

«Ular qoʻlimdagi videolarni tarqatib yuboramiz, deb bosim oʻtkazishgan. Buning oʻzi yetarli tahdid. Soʻngra meni kiyimsiz holatdagi videom bilan shantaj qilishdi. Hech bir ayol bu holatdan soʻng tinch oʻtira olmaydi», — deydi u.

Guliraʼno Qosimova har bir sud majlisini sud ochiq boʻlishi haqidagi iltimosi bilan boshlar, ammo rad javobi olayotganini maʼlum qildi.

«Sudda gapirishimga ruxsat berilmasa, jurnalistlar bilan ham gaplasha olmasam, men qayerdan adolat izlay? Men xalqdan yordam soʻrayapman», — deydi u.

«Internetga chiqishimni ayblashadi, lekin men boshqa chora topmadim»

Qosimovaning soʻzlariga koʻra, u internetda videomurojaat qilishdan avval prokuratura va boshqa idoralarga necha bor murojaat qilgan, ammo natija boʻlmagan.

«Hatto jurnalistlar menga „toʻxtang, sizni oʻldirib qoʻyishadi“, deyishdi. Lekin men toʻxtamayman. Men kurashayotgan boʻlsam, bu boshqa ayollar men kabi tahqirlanmasligi uchun», — deya taʼkidlaydi u.

Ayolning soʻzlariga koʻra, qarshi tomonning advokatlari uning murojaatlarini «davlatga qarshi chiqish» sifatida talqin qilmoqda.

«Men haqiqatni ayta olmas ekanman, himoya soʻray olmas ekanman, unda mening huquqlarim qayerda? Menni urganlar, tahqirlaganlar javobgar boʻlmaguncha ortga qaytmayman», — deydi Qosimova.

Oliy sud izohi

Oliy sud matbuot kotibi Aziz Abidovning maʼlum qilishicha, ishda jabrlanuvchilarning kiyimsiz holatdagi videoyazuvi mavjud boʻlgani uchun ayrim sud majlislari maxfiy tarzda oʻtkazilmoqda.

«7 noyabr kuni Qosimova sud tartibini buzgani uchun ogohlantirilgan, ammo u takroran tartibni buzgani sababli Jinoyat-protsessual kodeksning 272-moddasiga asosan sud zalidan chiqarib yuborilgan», — deydi Abidov.

Uning maʼlumoticha, keyingi sud majlisi 12 noyabr kuni soat 10:00 da ochiq tarzda oʻtkaziladi.

Jamoatchilik munosabati

Guliraʼno Qosimovaning suddan chiqarilishi va uning internetdagi kiberbulling hujumlariga uchrayotgani faollar noroziligiga sabab boʻldi.

Huquqshunos Kamola Aliyeva bu ishni «jamiyatning insoniylik va adolatga munosabatini koʻrsatuvchi koʻzgu» deb atadi.

«Ayolning shaʼni emas, huquqi muhim boʻlishi kerak. Hozir esa u internetda ikkinchi marta tahqirlanmoqda. Bu nafaqat bir inson, balki butun jamiyat adolat tamoyillariga qarshi harakatdir», — deydi Aliyeva.

Jurnalist Ilyos Safarov ham Guliraʼno Qosimovaga qarshi uyushgan kiberxujumlar ketmoqda, deb hisoblaydi.

«Fargʻonadagi bloger va trollar orqali uni qoralash, IIBni oqlash harakatlari olib borilyapti. U bir necha bor tahqirlangan, hatto oʻz joniga qasd qilgan, ammo adolatga ishonib qayta turibdi. Endi esa u kibermakonda ham himoyasiz qoldi», — deydi Safarov.

Bloger Shahnoza Soatova esa qoʻshimcha qiladi:

«Ayolni obroʻsizlantirish oson, bir tuhmat yetarli. Uning „buzuqligiga“ ishonishga tayyor katta massa bor. Bu faqat Guliraʼno emas — bu tizim muammosi», — deb yozadi u.

Eslatib oʻtamiz, Furqat tumanida IIB xodimlari 34 yoshli ayolni kaltaklab, yechintirib, tahqirlagani aniqlangan edi. Ular ayolni soliq inspeksiyasi boshligʻi ustidan yolgʻon ariza yozishga majbur qilgan.

IIV rahbarining maslahatchisi Zokirjon Almatov bu holat yuzasidan fikr bildirib, «tizim bunday rahbarlarni kechirmasligini» taʼkidlagan. Senat ishni nazoratga olgan, Oliy sud maʼlumotiga koʻra, Furqat tumani IIBning sobiq boshligʻi va oʻrinbosari oltita modda boʻyicha ayblanmoqda.

8 oktabr kuni Quva tuman sudida mazkur ish boʻyicha sud jarayonlari boshlangan.