Alanga ichida qolgan Los-Anjeles: Amerikada nimalar yuz bermoqda?

Mahalliy Sogʻliqni saqlash boshqarmasiga koʻra, yongʻin 10 mingdan ortiq bino va inshootlarni vayron qilgan. Ayniqsa, shtatning Paliseyds hududi eng koʻp zarar koʻrgan joylardan biri boʻlgan. Bu hududda yongʻin taxminan 20 ming gektar yer maydonini yoqib yuborgan. Yongʻin tezligi va qamrovi aholini evakuatsiya qilishni yanada murakkablashtirgan. 

Los-Anjeles okrugi sherifi Robert shtatda komendantlik soati eʼlon qilgan. Komendantlik soatida Palisades, Eaton va yongʻinlar atrofidagi boshqa hududlarda ertalab soat 6 dan 18:00 gacha amal qilinishi taʼkidlangan. 

Pasadena meri Viktor Gordoning aytishicha, evakuatsiya qilingan aholi rasmiylar tomonidan xabardor qilinmaguncha uylariga qaytmasliklari kerak.

"Ayni paytda Los-Anjeles okrugida 180 mingga yaqin odam evakuatsiya qilish boʻyicha, yana 200 ming kishi esa evakuatsiya boʻyicha ogohlantirish ostida", degan u.

Yongʻin oqibatida koʻplab mashhur shaxslarning mulklari ham jiddiy zarar koʻrdi. Jumladan, AQSh vitse-prezidenti Kamala Xarrisning uyi, aktyorlar Ben Afflek va Tom Xenksning, shuningdek, qoʻshiqchi Riannaning uylariga yongʻin yetib bordi. Malibuda esa aktyor va qoʻshiqchi Peris Xiltonga tegishli boʻlgan uylardan biri butunlay kulga aylangan. 

Prezident Jo Bayden esa shtatda keng koʻlamli ofat rejimini joriy etdi. Ushbu rejim doirasida Gollivud yaqinidagi hududlardan 180 mingdan ortiq odam evakuatsiya qilindi. Evakuatsiya jarayonida aholi xavfsiz hududlarga koʻchirilgan. 

Dastlabki baholashlarga koʻra, yongʻinlar oqibatida yetkazilgan moddiy zarar miqdori 50 milliard AQSh dollaridan oshgan. Bu zarar nafaqat binolar va infratuzilmaga, balki shaharning iqtisodiyotiga ham katta taʼsir koʻrsatmoqda. Minglab odamlar oʻz uylarini va mol-mulklarini yoʻqotib, yordamga muhtoj boʻlib qolishgan. 

Hozirgi vaqtda yongʻinlarni oʻchirish ishlari davom etmoqda. Biroq kuchli shamol va quruq ob-havo sharoiti vaziyatni murakkablashtirmoqda. Yongʻinni oʻchirish uchun oʻnlab yongʻin oʻchirish brigadalari, maxsus texnika va samolyotlar jalb etilgan. Mutasaddilar aholiga xavfsizlik choralariga rioya qilish, rasmiylarning koʻrsatmalariga qatʼiy amal qilish va zarurat boʻlsa, evakuatsiya zonalaridan chiqishni tavsiya qilishmoqda.