Trampning Eron Los-Anjeles va San-Diyegoni egallashi haqidagi gapi tanqidga uchradi

Tramp 5-oktabr kuni Nebraskadagi saylovoldi mitingida AQSh va Isroilning Eronga qarshi urushida g‘alaba qozonish uchun amerikaliklar ayrim qurbonliklarga tayyor bo‘lishi kerakligini aytdi.

U ehtimoliy Eron hujumida AQSh shaharlari nishonga olinishi mumkinligini nazarda tutib, Los-Anjeles va San-Diyegoga hujum qilinishi “juda kichik narx” ekanini ta’kidladi. Tramp urush tez orada yakunlanishini ham aytdi.

Kaliforniya gubernatori, demokrat Gavin Nyusom Trampning so‘zlarini keskin qoraladi. U prezident bayonotlarini “xavfli” deb atab, Kongressni Trampning harakatlarini cheklashga chaqirdi.

Trampning o‘z partiyasidagi ayrim siyosatchilar ham uning fikrlaridan uzoqlashdi. San-Diyego yaqinidan Vakillar palatasiga nomzod bo‘layotgan respublikachi Jim Desmond AQShning asosiy vazifasi amerikaliklar va mamlakat hududini himoya qilish ekanini bildirdi.

“Fikrimcha, hech bir Amerika shahri qurbon qilinishi va hech bir amerikalik oila tasodifiy zarar ko‘rishi kerak emas”, – deb yozdi u.

Oq uy esa Trampga nisbatan bildirilgan tanqidlarni rad etdi. Prezident matbuot kotibi Stiven Cheung Tramp AQSh shaharlari yadroviy qurolga ega Eron tomonidan tahdid ostida qolishi mumkinligini nazarda tutganini aytdi.

AQShda noyabr oyida oraliq saylovlar bo‘lib o‘tadi. Vakillar palatasining barcha 435 o‘rni hamda Senatdagi o‘rinlarning uchdan bir qismi uchun saylov o‘tkaziladi. Saylov natijalari Tramp prezidentligining ikkinchi muddatidagi so‘nggi ikki yiliga sezilarli ta’sir ko‘rsatishi kutilmoqda.