Janubiy Xitoy dengizi ustida Xitoy va Avstraliya oʻrtasida tanglik yuzaga keldi

Xitoy armiyasining Janubiy fronti bayonotiga koʻra, Avstraliya qirollik harbiy-havo kuchlariga tegishli “P-8A Poseidon” patrul samolyoti “Xitoy havo hududiga noqonuniy ravishda kirgan”. Shundan soʻng xitoylik harbiylar samolyotni kuzatib borib, uni hududdan chiqarish boʻyicha chora koʻrgan. Pekin bu holatni suverenitetni buzish deb baholagan.

Avstraliya mudofaa vazirligi esa boshqacha bayonot berdi. Maʼlumotlarga koʻra, Xitoyning Su-35 harbiy samolyoti avstraliyalik samolyotga yaqin kelib, xavfli manyovr qilgan va yorugʻ raketa (signal flare) otgan. Avstraliya buni xalqaro parvoz xavfsizligi qoidalarini buzish deb hisobladi.

Rasmiy Kanberra maʼlumotlarida taʼkidlanishicha, Avstraliya bu hududda xalqaro huquq asosida kuzatuv parvozlarini amalga oshiradi va “dengiz va havo yoʻllarida erkin harakatlanish milliy manfaatlarimizning asosidir” deb bayonot berdi.

Mudofaa vaziri Richard Marlzning soʻzlariga koʻra, Avstraliya hukumatining rasmiy diplomatik noroziligi Xitoyga yetkazilgan.

Maʼlumot uchun:

Janubiy Xitoy dengizi Ikkinchi jahon urushidan keyingi davrdan buyon hududiy daʼvolar markazida boʻlib keladi. Xitoy 1947 yilda dengiz hududining 80 foizi oʻziniki ekanini maʼlum qilgan, ammo bu hududga Filippin, Vetnam, Bruney va Malayziya ham daʼvo qiladi.

2016 yilda Haagadagi Xalqaro arbitraj sudi Filippin daʼvosi boʻyicha qaror chiqarib, Xitoyning dengiz ustidan yakkahokimlik daʼvolarini huquqiy jihatdan asossiz deb topgan.