Bosh prokuratura: 248 ming nafar fuqaroning buzilgan huquqlari tiklandi

Joriy yil 6 oyida prokuratura organlari tomonidan aniqlangan qonunbuzilishi holatlari yuzasidan 102 mingga yaqin nazorat hujjatlari qoʻllanilib, 248 ming nafar fuqaroning buzilgan huquqlari tiklangan.

Nazorat tadbirlari va dastlabki tergov davomida aybdor shaxslardan fuqarolar va davlat manfaatlariga yetkazilgani aniqlangan 1,3 trillion soʻmlik zararning undirilishi taʼminlangan.

Aholini ijtimoiy muhofaza qilish, bandligini taʼminlash, kambagʻallikni qisqartirish, yoshlar va xotin-qizlarni har tomonlama qoʻllab-quvvatlashga oid qonunchilik ijrosini taʼminlashga alohida eʼtibor qaratilgan. Xususan, prokurorlar tashabbusi bilan 842 marotaba boʻsh ish oʻrinlari mehnat yarmarkalari oʻtkazilib, ularda 5 ming 389 nafar ishsiz fuqaro ishga joylashtirilgan.

Tadbirkorlikni jadal rivojlantirish, investitsiyalarni jalb etish, eksport hajmini oshirish kabi iqtisodiyot rivojidagi dolzarb yoʻnalishlarda tizimli tadbirlar amalga oshirilib, qariyb 9 ming nafar tadbirkorning buzilgan huquqlari tiklangan. 18 ming nafardan ortigʻiga muammolarini bartaraf etishda koʻmaklashilgan.

Aholi, iqtisodiyot tarmoqlari va ijtimoiy soha obʼektlarini energiya resurslari bilan barqaror taʼminlash maqsadida prokuratura organlari aralashuvi natijasida koʻplab muammolar bartaraf etilishiga erishilgan. Yoqilgʻi-energetika sohasida qonuniylikni taʼminlash maqsadida oʻtkazilgan qariyb 70 mingta reyd tadbirlari davomida 67 mingdan ortiq noqonuniy holatlar fosh etilib, 758 milliard soʻm zarar undirilgan.

Prokuror nazorati tadbirlari oʻlaroq, davlat dasturlariga kiritilgan 5 ming 661 qurilish obʼektining oʻz muddatida foydalanishga topshirilishi, 3,7 trillion soʻm mablagʻlar tejalishi taʼminlangan.

Yashirin iqtisodiyotga qarshi kurashish, xufiyona aylanmalar koʻlamini keskin qisqartirish, moliya tizimi barqarorligini yanada mustahkamlash borasida yuklatilgan vazifalar ijrosi ustidan taʼsirchan nazorat oʻrnatilmoqda. 

Yer resurslaridan samarali va oqilona foydalanishni taʼminlash masalalariga alohida eʼtibor qaratilmoqda. Bu borada oʻtkazilgan nazorat tadbirlarida oʻzboshimchalik bilan egallangani aniqlangan 861 gektar yer maydonlari zaxiraga qaytarilishi taʼminlangan. Shuningdek, 626 gektar yer maydonlarini talon-toroj qilish bilan bogʻliq holatlar yuzasidan 977 jinoyat ishi qoʻzgʻatilgan.

Xalq bilan ochiq muloqot qilish, fuqarolarni qiynayotgan muammolarni hal etishga ustuvor ahamiyat qaratilib, hisobot davrida 120 ming murojaat bevosita prokuraturada hal etilgan va 29 ming nafar shaxslarning buzilgan huquqlari tiklangan.