Boʻston tumani hokimining ikki oʻrinbosari pora bilan ushlandi

DXX xabariga koʻra, ular fermer xoʻjaligining 500 ming dollarlik eksport rejasini fiktiv operatsiyalar bilan yopib bermoqchi boʻlgan.

Andijon viloyati Boʻston tumani hokimining investitsiya masalalari boʻyicha oʻrinbosari va qishloq xoʻjaligi masalalari boʻyicha oʻrinbosari korrupsiyada ayblanib qoʻlga olindi.

Davlat xavfsizlik xizmati xabariga koʻra, ikki oʻrinbosar oʻzaro til biriktirib, tumanda faoliyat yurituvchi fermer xoʻjaligining 500 ming dollarlik eksport rejasini fiktiv operatsiyalar orqali yopib berish uchun fuqarodan 65 mln soʻm pora talab qilgan.

Joriy yil avgust oyida Boʻston hokimining qishloq xoʻjaligi masalalari boʻyicha oʻrinbosari avans tariqasida 25 mln soʻm olgan. U qolgan 40 mln soʻmni hokimning investitsiya masalalari boʻyicha oʻrinbosari orqali olgan vaqtida ushlangan.

Ularga nisbatan JKning 10-moddasi “v” va “g” bandlari (bir guruh mansabdor shaxslarning oldindan til biriktirgan holda, tamagirlik yoʻli bilan pora olishi) bilan jinoyat ishi qoʻzgʻatilgan va “qamoq” ehtiyot chorasi qoʻllangan.

Qayd etish lozim, DXX 2024 yil iyul oyida ham Boʻston tumani hokimining qishloq xoʻjaligi masalalari boʻyicha oʻrinbosari lavozimida ishlagan 10 ming dollar pora bilan ushlangani haqida xabar bergandi.