Toshkentda tezkor xodimga 10 ming dollar pora bermoqchi boʻlgan shaxs ushlandi

“Dolzarb 20 kunlik” tadbirlari boshlanganidan buyon Toshkentda 270 ta jinoyat fosh etilgan. 117 ta giyohvandlik vositalari bilan bogʻliq holatda 4 kilogramm 578 gramm taqiqlangan moddalar, 1000 ta psixotrop dori vositalari aniqlangan.

Shu kabi holatlardan birida, Shayxontohur tumanida oʻz uyida giyohvandlik vositalarini saqlab kelayotgan shaxs aniqlangan. Bunda fuqaro jinoyat-qidiruv boʻlimi tezkor xodimiga aniqlangan vaziyat yuzasidan chora koʻrmaslik uchun 10 ming dollar pora taklif qilgan.

Shundan soʻng, tegishli bildirgi asosida tezkor tadbir oʻtkazilib, fuqaro pullarni pora tariqasida bergan vaqtida qoʻlga tushdi.

Ushbu holat yuzasidan Jinoyat kodeksining pora berishni nazarda tutuvchi moddasi bilan jinoyat ishi ochilgan.