Buxoroda qotil ona ikkinchi farzandini ham oʻldirdi

Unda qayd etilishicha, asli surxondaryolik boʻlgan, bugungi kunda Buxoro shahri "Gulshan" mahallasida istiqomat qilib kelayotgan ayol 2021 yilda tugʻilgan farzandini koʻkrak, yuz va bosh qismiga urib, oʻldirgan. Aniqlanishicha, mazkur jinoyatni sodir etgan fuqaro oldin ham farzandini oʻldirib, qamalib chiqqan. 

"Gulshan" mahalla fuqarolar yigʻini raisiga koʻra, ayol oʻzining oldin sodir etgan qilmishi uchun pushaymondek tutgan. Bundan tashqari, unda hech qanday agressivlik sezilmagan.

"Ayol bizning doimiy nazoratimizda boʻlgan. Mahallaga bir necha marta chaqirilgan. U bilan mahallamizda ishlaydigan xodimlar muloqotda boʻlib turgan. Bolasi navbatsiz tarzda tumandagi 25-bogʻchaga qoʻyilgan. Avgust oyidan boshlab, oʻzining arizasiga binoan bola nafaqasini ham olishni boshlagan. U bilan gaplashganimizda oʻzini doim xotirjam tutgan. Unda agressiv holatlar kuzatilmagan. Birinchi qilgan xatosidan xulosa qilgan deb biz uni hayotga qaytishiga yordam qilganmiz", deydi mahalla oqsoqoli.

Shuningdek, bolasini oʻldirgani aytilayotgan ayolning yashash joyidagi qoʻshnilarining bildirishicha, u uyidan chiqmagan. Odamlar bilan kam muloqot qilgan. Hatto qoʻshnilari orasida uni koʻrmaganlar ham bor.

"Shu joyda istiqomat qilaman, bolalar maydonchasiga har kun onalar farzandlarini olib chiqib, oʻynatishadi. Lekin men u ayolni biror marta koʻrmaganman. Boshqa qoʻshnilarimdan soʻrasam oʻzi bu ayol koʻchaga kam chiqishini aytishdi", deydi qoʻshni ayollardan biri.

Fuqaro yashash xonadoning qarshisidagi uyda turuvchi qoʻshnining fikriga koʻra, ayol u bilan bir necha bor suhbatlashishga uringan, biroq fuqaro eshigini ochmaganligi uchun gaplasholmagan.

"Nega bu ayol doim odamlardan qochadi, deya u bilan samimiy gaplashishga harakat qilib koʻrganman. Uyiga bir necha marta ovqat olib chiqdim, ammo eshikni ochmagani bois u bilan gaplasholmadim. Baqirib bolasini urishganda men bolani maktab yoshida deb oʻylaganman. Chunki u farzandini sumkang qani, nega kiyimingni kir qilding deya koyirdi", deydi nafaqa yoshidagi ayol.

Shuningdek, u gapida davom etarkan, ayolni ruhiy nosogʻlomlikda ayblay olmasligiga ham toʻxtalgan.

"Ayolning ruhiy holatini yomon deyolmayman. Chunki uyidan ortiqcha gap-soʻz chiqmagan, biroq oʻta qattiqqoʻl, mehrsiz ona edi. Ijtimoiy tarmoqlarda bolani koʻrganimda hayratlandim. Sababi bola hali uch yoshga ham toʻlmagan ekan", deydi qoʻshnisi.

Bosh prokuratura matbuot kotibi Hayot Shamsutdinovning PARADIGMA.UZ'ga bergan maʼlumotiga koʻra, hozirda mazkur holat yuzasidan Buxoro shahar prokuraturasi tomonidan ayolga nisbatan Jinoyat kodeksining 97-moddasi 2-qismi "v" bandi bilan jinoyat ishi qoʻzgʻatilib, u himoya huquqi taʼminlangan holda JPKning 221-moddasi tartibida ushlangan.