Qorakoʻlda 20 nafar abituriyent zaharlanishi yuzasidan SSB rasmiy munosabat bildirdi

Buxoro viloyati Qorakoʻl tumanida joylashgan oʻquv markazlaridan birida abituriyentlar zaharlanish belgilari bilan shifoxonaga murojaat qilgani haqida xabarlar tarqaldi. Mazkur holat yuzasidan Buxoro viloyati Sogʻliqni saqlash boshqarmasi rasmiy munosabat bildirdi.

Maʼlum qilinishicha, Qorakoʻl tumani Hoʻjalar mahalla fuqarolar yigʻini, Ulugʻbek koʻchasida joylashgan “Ilm nuri” MChJga qarashli oʻquv markazida tahsil olayotgan 20 nafar abituriyentda nomaʼlum modda taʼsirida zaharlanish holati aniqlangan.

Hodisa haqida xabar kelib tushishi bilan abituriyentlar zudlik bilan tuman tibbiyot birlashmasiga olib kelingan. Shifokorlar tomonidan koʻrsatilgan tezkor tibbiy yordam natijasida barcha bemorlarning ahvoli yaxshilangan.

Qayd etilishicha, 20 nafar abituriyent ambulator tartibda davolanish uchun uyiga javob berilgan. Har bir bemor hududiy oilaviy shifokor hamda patronaj hamshirasiga biriktirilgan. Ayni paytda ularning ahvoli qoniqarli boʻlib, qoʻshimcha shikoyatlar mavjud emas.

Ekspertiza natijalariga koʻra, holat boʻyicha qoʻshimcha maʼlumotlar taqdim etilishi maʼlum qilindi.