Chexiya oʻzbekistonlik migrantlarga nimalarni taklif qilmoqda?

Qayd etilishicha, Chexiya migrantlar uchun "Ixtiyoriy qaytish" dasturini ishlab chiqqan. Dasturga koʻra, mamlakatdan chiqib ketishda qonuniy majburiyatga ega boʻlgan, ammo buni bajarish uchun qiyinchiliklarga duch kelayotgan chet elliklarga yordam beriladi.

"Biz sizga vataningizga qaytishingiz bilan bogʻliq muammolarni hal qilishda yordam beramiz. Bu yerda noqonuniy tarzda yashab qolishga urinmang. Bunday qilsangiz deportatsiya qilinishingiz va Chexiya Respublikasi yoki Yevropa Ittifoqiga kelishingizga uzoq muddatli taqiq qoʻyilishi mumkin", deyiladi vazirlik xabarida.

Shuningdek, Chexiya hukumati migrantlarga samolyotga chipta olib berishni, hatto mamlakatda sayohat qilish uchun zarur boʻlgan vaqtinchalik hujjatni ham taqdim etishini vaʼda bergan.

"Agar siz Chexiya Respublikasi hududini “Ixtiyoriy qaytish” dasturi yordamida tark etishga qaror qilsangiz, Chexiya politsiyasi ishtirokisiz oddiy sayyoh kabi oʻz mamlakatingizga qaytasiz. Sizning sayohatingiz munosib tarzda oʻtadi", deya xabarda qoʻshimcha qilingan.

Vazirlik xabariga koʻra, "Ixtiyoriy qaytish" dasturidan maʼmuriy deportatsiya qilingan yoki davlatdan chiqarib yuborish bilan jazo tayinlangan fuqarolar yuqoridagi imkoniyatdan foydalanishi mumkin. 

Yana bular qatoriga Chexiya Respublikasiga ishlash yoki oʻqish maqsadida uzoq vaqt yoki doimiy istiqomat qilish uchun kelgan, ammo Chexiya organlari tomonidan vizasi bekor qilingan yoki uzaytirilmagan boshqa davlat fuqarosi ham ariza berishi mumkinligi aytilgan.