Rossiyada Oʻzbekistonlik migrant OMONchilar tomonidan kaltaklab oʻldirildi

Manbalarga koʻra, voqea 12 dekabr kuni Xabarovskda sodir boʻlgan. Kuchishlatar tuzilmalar vakillari shahardagi kafelardan biriga kirib, u yerda boʻlgan bir guruh Oʻzbekiston fuqarolariga nisbatan kuch ishlatgan.

Hodisa oqibatida ikki nafar Oʻzbekiston fuqarosi ogʻir tan jarohati olib shifoxonaga yotqizilgan. Ularning biri bir necha kundan soʻng vafot etgan, ikkinchi fuqaro esa hozirda ogʻir ahvolda davolanmoqda.

Maʼlum qilinishicha, marhum Samarqand viloyati Kattaqoʻrgʻon tumani Jumavoy qishlogʻida tugʻilgan.

Holat Oʻzbekistonning Vladivostokdagi Bosh konsulxonasi va Migratsiya agentligi tomonidan nazoratga olingan. Bosh konsulxona marhumning yaqinlari bilan doimiy aloqada boʻlib, zarur konsullik va amaliy yordam koʻrsatmoqda.
Fuqaroning jasadini Oʻzbekistonga qaytarish boʻyicha ishlar olib borilmoqda.

Shuningdek, Xabarovsk oʻlkasi Prokuraturasi va Tergov boshqarmasiga, shu bilan birga Rossiya Federatsiyasi Tashqi ishlar vazirligining Xabarovskdagi vakolatxonasiga yuborilgan notalar orqali holatni xolisona va qonuniy tartibda oʻrganish soʻralgan.