Chirchiqda siam egizaklari noyob operatsiya orqali ajratib olindi

Homiladorlikning 33–34 haftaligida kesarcha kesish orqali muddatidan avval tugʻilgan siam egizaklar tugʻuruqdan 9 soat oʻtgach, shoshilinch ravishda va mahalliy sharoitda oʻta murakkab operatsiya orqali ajratib olindi.

Operatsiya besh soat davom etgan.

«Bu — oʻta noyob operatsiya. Muddatidan avval tugʻilgan siam egizaklarni shoshilinch ravishda va viloyat darajasida muvaffaqiyatli ajratib olinishi — mamlakatimiz tibbiyoti yangi bosqichga koʻtarilganidan dalolat beradi», — dedi Sogʻliqni saqlash vaziri Asilbek Xudayarov.

Vazir operatsiyada ishtirok etgan bir guruh mutaxassislarni “Oʻzbekiston Respublikasi sogʻliqni saqlash aʼlochisi” koʻkrak nishoni bilan taqdirladi.

Ayni vaqtda jajji bemorlarning salomatligi yaxshi, ularning onasiga esa bugun shifoxonadan uyiga javob berildi.