Oʻzbekistonda ilk bor unikal yurak jarrohligi amalga oshirildi

Kuni kecha Toshkent davlat tibbiyot universitetining bolalar koʻp tarmoqli klinikasida yurtimiz tarixida ilk bor yangi turdagi operatsiya oʻtkazildi.

Gap shundaki, bolalar kardiojarrohi Bobur Toʻrayev 6 yoshli bolaning zararlangan uch tabaqali klapanini olib tashladi, oʻrniga esa yurakning oʻng boʻlmachasi quloqchasidan klapan yasab oʻrnatdi.

Texnologik jihatdan murakkab hisoblangan ushbu jarrohlik amaliyoti mamlakatimizda birinchi bor oʻtkazilishidan tashqari, rivojlangan tibbiyot markazlaridagina bajarilishi bilan ahamiyatlidir.

Toshkent davlat tibbiyot universitetining bolalar koʻp tarmoqli klinikasida joriy yilning oʻtgan 8 oyida tibbiyot fanlari nomzodi, boʻlim mudiri Nodir Ibragimov boshchiligida 500 ga yaqin kardiojarrohlik amaliyotlari oʻtkazildi. Bunda  Bobur Toʻrayevning ham alohida hissasi bor.

Maʼlumot uchun aytish kerakki, B.Toʻrayev 2018 — 2019 yillarda “El-yurt umidi” jamgʻarmasi stipendiati sifatida Buyuk Britaniyaning University College London universiteti magistratura bosqichida taʼlim olgan. U 10 ga yaqin rivojlangan davlatlar klinikalarida malaka oshirgan va 20 ga yaqin ilmiy maqolalar muallifi sanaladi. Yosh boʻlishiga qaramay, ming nafardan ortiq bemor bolalarda yurak operatsiyalarini muvaffaqiyatli bajargan.

Toshkent davlat tibbiyot universiteti bolalar koʻp tarmoqli klinikasining ushbu yutugʻi soha vakillarini yangi marralar sari ilhomlantirishi, shubhasiz.