SSV tizimida 1000 dan ortiq manfaatlar toʻqnashuvi holatlari aniqlandi

Bu haqda Korrupsiyaga qarshi kurashish agentligi maʼlum qildi.

Maʼlumotlarga koʻra, holatlar quyidagi muassasalarda qayd etilgan:

• 134 ta — ixtisoslashtirilgan ilmiy-amaliy tibbiyot markazlari va respublika muassasalarida;

• 347 ta — hududiy sogʻliqni saqlash boshqarmalari hamda tuman (shahar) tibbiyot boʻlimlarida;

• 796 ta — boshqa tibbiyot muassasalari va vazirlik tizimi tashkilotlarida.

Masalan, Virusologiya ilmiy tekshirish instituti moliya-iqtisod boʻlimi boshligʻi N.A. hamda Andijon viloyati sogʻliqni saqlash boshqarmasining bosh hisobchisi G.G. oʻz boʻysunuvidagi qarindoshlari bilan birgalikda ishlagani aniqlangan.

Shuningdek, Ulugʻnor tumani tibbiyot birlashmasi bosh hisobchisi A.M. oʻz lavozimidan foydalanib, yaqin qarindoshlarini hamshira va laborant vazifalariga ishga joylashtirgan.

Agentlik maʼlumoticha, bunday holatlarga yoʻl qoʻygan xodimlar bilan mehnat shartnomalari bekor qilingan yoki ular rotatsiya qilingan.

Qoʻshimcha ravishda, vazirlikning Korrupsiyaga qarshi ichki nazorat boʻlimi olib borgan tekshiruvlar natijasida sohadagi 567 ta qonunbuzilish holati oʻz vaqtida bartaraf etilgan.