Pensiya tizimida yangi tartib: qog‘oz shaklida hujjat taqdim etish bekor qilinadi

Prezident qarori bilan pensiya ta’minoti tizimini raqamlashtirish va xizmatlarni proaktiv shaklga o‘tkazish bo‘yicha yangi tartiblar belgilandi.

Unga ko‘ra, 2026-yil 1-noyabrdan korxona tugatilishi yoki shtat qisqarishi sabab ishsiz deb e’tirof etilgan shaxslarga muddatidan oldin yoshga doir pensiya alohida murojaatsiz tayinlanadi.

2027-yil 1-yanvardan boquvchisini yo‘qotganlik pensiyasini ham proaktiv tarzda tayinlash yo‘lga qo‘yiladi.

Shuningdek, 2027-yildan Pensiya jamg‘armasiga qog‘oz shaklida hujjat va ma’lumot taqdim etish amaliyoti bekor qilinadi.

Fuqarolar uchun «Mening pensiyam» onlayn xizmati ishga tushirilib, unda ish staji, oliy ta’limda o‘qigan va harbiy xizmat davri haqidagi ma’lumotlar hamda bo‘lajak pensiyaning taxminiy miqdorini ko‘rish imkoniyati yaratiladi.

Pensiya yoshiga bir yil qolgan fuqarolar bu haqda oldindan xabardor qilinadi. Pensiyani naqd pul shakliga o‘tkazish, to‘xtatilgan pensiya to‘lovini tiklash va pensiyadan ushlab qolinayotgan mablag‘lar haqida ma’lumot olish kabi xizmatlar ham onlayn shaklga o‘tkaziladi.

Bundan tashqari, 2026-yil 1-oktabrdan fuqarolik-huquqiy shartnoma asosida ishlovchilarga ijtimoiy soliq to‘lash orqali ushbu davrni ish stajiga qo‘shish imkoniyati beriladi.

2027-yil 1-yanvardan rasmiy daromadga ega shaxslar ishlamaydigan oila a’zolari uchun ixtiyoriy ravishda ijtimoiy soliq to‘lashi mumkin. Bunda har bir oila a’zosi uchun to‘lov miqdori mehnatga haq to‘lash eng kam miqdorining 12 foizini tashkil etadi.

Qarorda pensiya ta’minoti bo‘yicha xizmatlarni 2027-yil 1-yanvarga qadar to‘liq interaktiv va proaktiv shaklga o‘tkazish vazifasi belgilangan.