Erdoʻgʻan bilan koʻrishgan Suriyaning yangi yetakchisi u bilan nimalarni muhokama qildi?

Unga koʻra, Ahmad ash-Shara va Rajab Toyyib Erdoʻgʻan uchrashuv davomida Suriyaning iqtisodiyoti, qurolli kuchlarini tiklash masalalarini hamda xavfsizlik muammolarini muhokama qilgan. 

Uchrashuvdan keyin boʻlib oʻtgan qoʻshma matbuot anjumanida Erdoʻgʻan Turkiyaning Suriya boʻyicha siyosati har doim uning hududiy yaxlitligi va birligini saqlab qolish boʻlib kelganini taʼkidlagan. 

Turkiya yetakchisi vayron boʻlgan Suriya shaharlarini tiklashga koʻmak berishiga vaʼda berib, iqtisodiy taraqqiyot jadallashishi bilan qochqinlarning ixtiyoriy qaytish jarayoni ham tezlashishini qayd etgan.

"Arab va Islom dunyosi yangi maʼmuriyatga hamda Suriya xalqiga ushbu jarayonda zaruriy moddiy va maʼnaviy yordam koʻrsatishi muhim", deydi Erdoʻgʻan.

Ash-Sharʼa esa Turkiyaga koʻrsatilgan yordam uchun minnatdorlik bildirib, Erdoʻgʻanni Suriyaga taklif qildi. 

Turikya 13 yillik fuqarolar urushi davomida Suriyaning oldingi prezidenti Bashar Asadga qarshi chiqqan guruhlarni faol qoʻllab-quvvatlagan boʻlsada, hozirda yangi Suriya maʼmuriyatining asosiy ittifoqchilaridan biri hisoblanadi. 

Bu Suriya yangi yetakchisining ikkinchi xorijiy tashrifidir. Ash-Sharʼa bundan ikki kun oldin Ar-Riyodga borib, Saudiya Arabistoni, valiahd shahzodasi Muhammad bin Salmon bilan uchrashgan edi.