Fargʻona tumani hokimi jazolandi

Fargʻona tumani hokimi Hamidullo Inomovga hayfsan jazosi berildi. Bu haqda Fargʻona viloyat hokimi Xayrullo Bozorov farmoyish imzoladi. 

Hokim tumanda ijtimoiy-iqtisodiy rivojlantirish, aholi farovonligini taʼminlash va boshqa dolzarb masalalar boʻyicha amalga oshirilishi lozim boʻlgan vazifalarni bajarishda masʼuliyatsizlikka yoʻl qoʻygan. Shuningdek, Prezident Administratsiyasi ishchi guruhining viloyatga tashrifi davomida Fargʻona tumanidagi “Mindonobod” kichik sanoat zonasida olib borilgan oʻrganishlarda kamchiliklar aniqlangan.

Xususan, sanoat zonasiga joylashtirilgan 22 ta loyihalardan bugungi kunga qadar atigi 3 tasi ishga tushirilgani, qolgan 19 ta loyihalarni oʻz vaqtida ishga tushirish boʻyicha tizimli ishlar tashkil qilinmagani koʻrsatib oʻtildi hamda koʻp qavatli uylar atrofini obodonlashtirish va koʻkalamzorlashtirish ishlari amalga oshirilmagani aniqlandi. 

Fargʻona tumani hokimining barcha oʻrinbosarlari faoliyatini tubdan oʻzgartirib, III chorak yakuni boʻyicha yuqori natijaga erishmasa lavozimidan olinadi. 

Ushbu qaror ijrosini nazorat qilishni Fargʻona viloyati hokimi oʻz zimmasida qoldirgan.