IIBB korxona va tashkilot xodimlarini ogohlantirdi

"Shu kunlarda firibgarlar tomonidan Telegram messenjeri orqali yuqori lavozimlarda ishlovchi vazirlik, idora va turli xil tashkilotlar rahbar hamda masʼul xodimlari nomidan soxta profillar yaratilib, qoʻl ostidagi xodimlarni aldash holatlari kuzatilmoqda", deyiladi IIBB xabarida.  

Firibgarlar korxona yoki tashkilot rahbari nomidan Telegram messenjerida soxta hisob ochib, qoʻl ostidagi ishchilardan biriga SMS yozgani maʼlum boʻldi. Muloqot davomida ular xodim bilan boshliq obrazida gaplashib huquqni muhofaza qiluvchi organlar ularga qiziqayotgani bildirib ulardan maʼlumot soʻrashgani aniqlangan.

"Firibgarning gaplariga ishongan xodim bir necha daqiqadan soʻng u bilan aloqaga chiqqan shaxsga (goʻyoki huquqni muhofaza qiluvchi organ vakili) soʻragan barcha maʼlumotlarini berib yuboradi. Buning oqibatida firibgarlar tuzogʻiga ilingan ishchi-xizmatchilar plastik kartalaridagi pul mablagʻlaridan ayrilib qolmoqdalar", deya qoʻshimcha qilingan manbada.

Firibgarlarning aldoviga boshqalar chuv tushib qolmasligi uchun shu turdagi kelgan SMS yoki boshqa xabarlarni qabul qilish va ishonishdan oldin telefon orqali qoʻngʻiroq qilib yoki shaxsan xabar yuborgan shaxsga aloqaga chiqib, xabarni qayta tekshirish kerakligi bildirilgan.