Oʻzbekistonda taksi haydovchilarining daromadi yiliga 1 mln soʻmdan ham oshmadi — DSQ

Davlat soliq qoʻmitasi matbuot xizmati maʼlum qilishicha, 2025 yil davomida 224 ta taksi agregatori soliq organlarining axborot tizimlari bilan integratsiya qilingan. Ushbu agregatorlar orqali jami 479 millionta safar amalga oshirilgan.

Taksi xizmatlari koʻrsatishdan tushgan umumiy aylanma 9,6 trillion soʻmdan oshgan. Shundan 6,7 trillion soʻm (70,2 foiz) naqd pul, 2,8 trillion soʻm (29,8 foiz) esa naqdsiz shaklda toʻlangan. Oʻrtacha bir safar qiymati 20,1 ming soʻmni tashkil etgan.

Yil davomida 100 million soʻmdan ortiq daromad olgan haydovchilar soni 15,5 ming nafardan oshgan. Biroq haydovchilarning aksariyati — 159,7 ming nafari yiliga 1 million soʻmdan kam daromad topgan.

Daromadlar quyidagicha taqsimlangan:

• 50–100 mln soʻm — 36,9 ming haydovchi;
• 10–50 mln soʻm — 143,8 ming haydovchi;
• 5–10 mln soʻm — 71,8 ming haydovchi;
• 1–5 mln soʻm — 146,7 ming haydovchi.

Taksi agregatorlari orqali yoʻlovchi tashish bilan 574,6 ming nafar oʻzini oʻzi band qilgan haydovchi shugʻullanadi. Ularning 59,1 foizi (339 681 nafar) 30–50 yosh oraligʻidagi fuqarolar, 33 foizi (189 547 nafar) 30 yoshgacha boʻlganlar, 7,9 foizi (45 398 nafar) esa 50 yoshdan oshganlardir. Shuningdek, agregatorlar orqali 4 726 nafar ayol haydovchi faoliyat yuritmoqda.

Taksillarda eng koʻp foydalanilayotgan avtomobillar — Cobalt (23,7%), Nexia (20,7%) va Lacetti (16,9%). Elektromobillar ulushi 1,9 foizni tashkil etadi.

Aksariyat taksi avtomobillari 3–5 yillik boʻlib, 5–10 yillik mashinalar eng kam ulushga ega.

2025 yilda taksi agregatorlari tomonidan jami 128,2 milliard soʻm soliq toʻlangan boʻlib, shundan 63,6 milliard soʻmi qoʻshilgan qiymat soligʻiga toʻgʻri keladi.