Oʻzbekiston aholisining daromadlari oshgani eʼlon qilindi

Statistika qoʻmitasi taqdim qilgan 7 oylik hisobotga koʻra, isteʼmol narxlarining oʻzgarishi sababli oʻtgan yilning mos davriga nisbatan aholi umumiy daromadlarining real oʻsish surʼati 109,5 % ni tashkil etgan.

Oʻtgan yilning mos davrida mazkur koʻrsatkich 111,9 %  ni tashkil etgan. Oʻsish surʼatining sekinlashishiga valyuta kursining moʻtadillashishi hamda shaxsiy isteʼmol uchun oʻzida ishlab chiqarilgan xizmatlardan olingan daromadlar, yaʼni “MHT – 2008” xalqaro standarti asosida oʻz uyida yashash boʻyicha xizmatlar (shartli uy-joy rentasi)ni baholash boʻyicha respublika boʻylab ijara toʻlovlari oʻsish surʼatlari past boʻlganligi tufayli qoʻshilgan qiymatning asosiy komponenti boʻlgan, operatsion foyda koʻrsatkichining oʻsish surʼatlari sekinlashishi kabi omillar taʼsir koʻrsatgan.

Shuningdek, yanvar-iyun holatiga koʻra, aholi jon boshiga umumiy daromadlar 13,7 mln soʻmni, aholi jon boshiga umumiy daromadlarning nominal oʻsish surʼati 117,7 % ni va real oʻsish surʼati 107,4 % ni tashkil etgan.

Mazkur oylarda aholi jon boshiga oʻrtacha umumiy daromadlar boʻyicha Toshkent shahri (35 079,6 ming soʻm), Navoiy (20 048,7 ming soʻm), Buxoro (15 883,9 ming soʻm) va Toshkent (13 740,5 ming soʻm) viloyatlarida oʻrtacha respublika darajasidan yuqori koʻrsatkichlar qayd etilgan.

Qoraqalpogʻiston Respublikasi (9 198,0 ming soʻm), Namangan (9 457,0 ming soʻm), Jizzax (10 220,2 ming soʻm), Surxondaryo (10 396,4 ming soʻm), Sirdaryo (10 451,8 ming soʻm), Qashqadaryo (10 563,3 ming soʻm), Samarqand (11 131,3 ming soʻm), Fargʻona (11 427,2 ming soʻm), Andijon (11 983,1 ming soʻm) va Xorazm (13 454,6 ming soʻm) viloyatlarida aholi jon boshiga umumiy daromadlar oʻrtacha respublika darajasidan past koʻrsatkichlar qayd etilgan.

Aholi jon boshiga umumiy daromadlarning eng yuqori real oʻsishi yuqori darajasi Fargʻona viloyati (15,5 %) hamda Toshkent shahrida (12,8 %) kuzatilgan. Qolgan viloyatlar va Qoraqalpogʻiston Respublikasida aholi jon boshiga umumiy daromadlarning oʻsishi past koʻrsatkichni tashkil qilgan.

Hisobotda yozilishicha, mazkur oylarda aholi umumiy daromadlarning katta qismi yuridik tashkilotlarda ishlovchi yollanma ishchilarning daromadlari aholi umumiy daromadlarning 60,6 %ini tashkil qiladi.

Shuningdek, aholi umumiy daromadlari tarkibida shaxsiy isteʼmol uchun oʻzida ishlab chiqarilgan xizmatlardan olingan daromadlarning ulushi 6,6 %, mol-mulkdan olingan daromadlarning ulushi 3,4 %, transfertlardan olingan daromadlar ulushi 29,4 % ni tashkil qildi.

Transfertlardan olingan daromadlarning ulushi Fargʻona, Andijon, Samarqand, Xorazm, Surxondaryo, Qashqadaryo, Namangan viloyatlarida hamda Qoraqalpogʻiston Respublikasi va Buxoro viloyatida aholi umumiy daromadlariga nisbatan 30 % dan yuqori koʻrsatkichni tashkil etgan boʻlsa, Navoiy viloyatida mazkur daromad turining ulushi eng past yaʼni, 13,9 % ni tashkil etdi.