Ўзбекистонда такси ҳайдовчиларининг даромади йилига 1 млн сўмдан ҳам ошмади — ДСҚ

Давлат солиқ қўмитаси матбуот хизмати маълум қилишича, 2025 йил давомида 224 та такси агрегатори солиқ органларининг ахборот тизимлари билан интеграция қилинган. Ушбу агрегаторлар орқали жами 479 миллионта сафар амалга оширилган.

Такси хизматлари кўрсатишдан тушган умумий айланма 9,6 триллион сўмдан ошган. Шундан 6,7 триллион сўм (70,2 фоиз) нақд пул, 2,8 триллион сўм (29,8 фоиз) эса нақдсиз шаклда тўланган. Ўртача бир сафар қиймати 20,1 минг сўмни ташкил этган.

Йил давомида 100 миллион сўмдан ортиқ даромад олган ҳайдовчилар сони 15,5 минг нафардан ошган. Бироқ ҳайдовчиларнинг аксарияти — 159,7 минг нафари йилига 1 миллион сўмдан кам даромад топган.

Даромадлар қуйидагича тақсимланган:

• 50–100 млн сўм — 36,9 минг ҳайдовчи;
• 10–50 млн сўм — 143,8 минг ҳайдовчи;
• 5–10 млн сўм — 71,8 минг ҳайдовчи;
• 1–5 млн сўм — 146,7 минг ҳайдовчи.

Такси агрегаторлари орқали йўловчи ташиш билан 574,6 минг нафар ўзини ўзи банд қилган ҳайдовчи шуғулланади. Уларнинг 59,1 фоизи (339 681 нафар) 30–50 ёш оралиғидаги фуқаролар, 33 фоизи (189 547 нафар) 30 ёшгача бўлганлар, 7,9 фоизи (45 398 нафар) эса 50 ёшдан ошганлардир. Шунингдек, агрегаторлар орқали 4 726 нафар аёл ҳайдовчи фаолият юритмоқда.

Таксилларда энг кўп фойдаланилаётган автомобиллар — Cobalt (23,7%), Nexia (20,7%) ва Lacetti (16,9%). Электромобиллар улуши 1,9 фоизни ташкил этади.

Аксарият такси автомобиллари 3–5 йиллик бўлиб, 5–10 йиллик машиналар энг кам улушга эга.

2025 йилда такси агрегаторлари томонидан жами 128,2 миллиард сўм солиқ тўланган бўлиб, шундан 63,6 миллиард сўми қўшилган қиймат солиғига тўғри келади.