Oʻzbekistonda taqiqlangan va cheklov qoʻyilgan tovarlar roʻyxati ochiqlanadi

Jamoatchilik muhokamasiga qoʻyilgan hukumat qarori loyihasiga koʻra, taqiqlar va cheklovlar toʻgʻrisidagi Yagona elektron reyestr “Integratsiyalashgan tarif” axborot tizimi bazasida 2026 yil 1 yanvardan boshlab yuritiladi.

Reyestr qanday shakllantiriladi?

— Iqtisodiyot va moliya vazirligi huzuridagi Bojxona qoʻmitasi bir oy muddatda barcha taqiq va cheklovlar roʻyxatini toʻliq shakllantiradi.
— Ikki oy ichida “Integratsiyalashgan tarif” bazasida real vaqtda bepul maʼlumot taqdim etuvchi “Yagona reyestr” boʻlimi ishga tushiriladi.
— Reyestrdagi maʼlumotlar doimiy ravishda yangilanib boradi.
— Shuningdek, reyestrni yangilash tartibi boʻyicha texnologik yoʻriqnoma ishlab chiqiladi.

Yangi tizim import, eksport va tranzit jarayonlarida ishtirok etuvchi tadbirkorlar uchun shaffoflikni oshirishi, bojxona jarayonlaridagi noaniqliklarni kamaytirishi kutilmoqda.

Muhokama muddati

Hujjat jamoatchilik muhokamasi uchun ochiq boʻlib, 2025 yil 14 dekabrga qadar davom etadi.