Toshkentda gumanoid robotlar zavodi qurilmoqda

Toshkentdagi “Yangi Avlod” maxsus sanoat zonasida gumanoid robotlar va ularning butlovchi qismlarini ishlab chiqaradigan zavod qurilishiga start berildi.

Mazkur tadbir beshinchi yubiley Toshkent xalqaro investitsiya forumi doirasida tashkil etildi.

Poydevorga birinchi g‘ishtni O‘zbekiston Respublikasi Bosh vazirining o‘rinbosari Jamshid Xodjayev, investitsiyalar, sanoat va savdo vazirining o‘rinbosari Ilzat Kasimov, Koreya Respublikasining mamlakatimizdagi Favqulodda va Muxtor Elchisi Von Do Yon hamda “ROBOTIS” kompaniyasi prezidenti Kim Byong Su qo‘ydi.

Loyiha doirasida mingdan ortiq malakali yangi ish o‘rinlari yaratilishi va ilg‘or xalqaro tajribaning transfer qilinishi kutilmoqda.  

“ROBOTIS” kompaniyasi

1999-yilda asos solingan Janubiy Koreyaning “ROBOTIS” kompaniyasi avtonom robototexnika sohasida jahon yetakchilaridan biri sanaladi. Aktivlari 2,5 milliard dollarini tashkil etuvchi ushbu yirik korxonaning AQSh, Yaponiya va Xitoyda vakolatxonalari mavjud.

Kompaniya texnologiyalaridan Amazon, Microsoft, Apple, NASA, Google, Samsung va BMW kabi dunyoga mashhur gigantlar keng foydalanib kelmoqda.