Kelasi hafta Seul Markaziy Osiyo sammitiga mezbonlik qiladi – Janubiy Koreya prezidenti

Janubiy Koreya prezidenti Li Je Myon 11-sentyabr kuni kelasi hafta Markaziy Osiyoning besh davlati rahbarlarini jamlaydigan ilk “Janubiy Koreya – Markaziy Osiyo” sammitiga mezbonlik qilishini ma’lum qildi. Bu haqda Reuters yozdi.

“Ushbu sammit orqali Janubiy Koreya va Markaziy Osiyo o‘rtasidagi munosabatlar rahbarlar darajasidagi ko‘p tomonlama hamkorlik tizimida mustahkamlanadi hamda biz yuritayotgan “Yangi Shimoliy siyosat”ga yangi sur’at bag‘ishlanishi kutilmoqda”, — dedi Li televideniye orqali qilgan murojaatida.

Prezident matbuot kotibi Kan Yu Jungning so‘zlariga ko‘ra, qo‘shma sammit arafasida, 14–16-sentyabr kunlari Markaziy Osiyoning har bir davlat rahbari bilan alohida ikki tomonlama uchrashuvlar o‘tkazish rejalashtirilgan.

Ushbu sammit Janubiy Koreya va Markaziy Osiyoning yetakchilar darajasidagi ilk ko‘p tomonlama uchrashuv bo‘lib, savdo, sarmoya, energetika, strategik muhim minerallar va ta’minot zanjirlari kabi sohalarda hamkorlikni mustahkamlashga qaratilgan.

Sobiq prezident Mun Chje In davrida yo‘lga qo‘yilgan Seulning “Yangi shimoliy siyosati” Markaziy Osiyo va Yevrosiyodagi boshqa hamkorlar bilan iqtisodiy, energetika va infratuzilma aloqalarini chuqurlashtirishni maqsad qilgan.