Tramp Kim Chen In bilan yana uchrashadimi?

The Economist yozishicha, Kimning muzokaradagi pozitsiyasi avvalgidan ancha kuchli. Shimoliy Koreya hozir o'nlab yadro kallaklariga va AQSH hududigacha yetib borishi mumkin bo'lgan raketalarga ega. Tramp Shimoliy Koreyada 57 ta yadro kallagi borligini aytgan, mustaqil hisob-kitoblarda esa ularning soni 120 tagacha bo'lishi mumkinligi ko'rsatiladi. Pxenyan yiliga yana 10-20 ta kallak uchun yetarli yadro materialini ishlab chiqarishi mumkin.

Bundan tashqari, Rossiya bilan yaqinlashuv Shimoliy Koreyaga qo'shimcha imkoniyat bermoqda. Pxenyan Rossiyaga artilleriya snaryadlari, ballistik raketalar va qariyb 16 ming askar yuborgan. Evaziga Shimoliy Koreya oziq-ovqat, yoqilg'i, mablag' va zamonaviy texnologiyalarga ega bo'lmoqda. Rossiyaning yordami tufayli xalqaro sanksiyalarning Pxenyanga bosimi ham avvalgidek kuchli emas.

Shu sababli AQSH va Janubiy Koreyada yangi yondashuv haqida bahslar kuchaymoqda. Seul Shimoliy Koreyani darhol yadro qurolidan butunlay voz kechishga majburlash o'rniga, avval uning yadro dasturini muzlatishni taklif qilmoqda. AQSHdagi ayrim ekspertlar ham to'liq yadrosizlantirish talabidan qurol-yarog'ni nazorat qilish va Shimoliy Koreya arsenalining yanada kengayishini cheklashga o'tishni taklif qilmoqda.

Biroq The Economist buning jiddiy xavflari borligini ta'kidlaydi. AQSH Shimoliy Koreyaning yadro maqomini amalda tan olsa, bu Kim Chen In uchun katta siyosiy yutuq bo'ladi. Bundan tashqari, Yaponiya va Janubiy Koreya o'z xavfsizligidan xavotirlanib, o'z yadro qurolini yaratish masalasini jiddiy ko'rib chiqishi mumkin.