Endi o‘zbekistonliklar Italiya qishloq xo‘jaligida ishlashi mumkin

Italiyaning “Confagricoltura” qishloq xo‘jaligi konfederatsiyasi vitse-prezidenti Luka Brondelli di Brondello bugun boshlangan birinchi Toshkent xalqaro migratsiya forumi doirasida aytishicha, Italiya qishloq xo‘jaligi konfederatsiyasi O‘zbekiston bilan xususan, Qishloq xo‘jaligi vazirligi va Migratsiya agentligi bilan yaqin munosabatlar o‘rnatgan.

Hamkorlikda amalga oshirayotgan o‘quv-kursi dasturini yakunlagan ishtirokchilar Italiyadagi fermer xo‘jaliklarida ishlash imkoniga ega bo‘ladi.

O‘quv-kursidan maqsad – O‘zbekiston fuqarolariga Italiyadagi hayot bilan tanishish, qishloq xo‘jaligidagi zamonaviy usullarni o‘rganish va tajriba olish imkonini yaratish.

Italiyada oziq-ovqat va vinochilik sohasi jadal rivojlanmoqda. So‘nggi o‘n yilda eksport ikki barobardan ko‘proq o‘sib, yiliga 73 milliard yevroga yetdi.

“Shu sababli, bizga malakali mutaxassislar zarur. O‘zbekistonda o‘qishga, yangi texnologiyalarni o‘zlashtirishga va tajriba olishga intilayotgan ko‘plab yoshlar bor, deb ishonaman. Shu bois, ushbu hamkorlik ham O‘zbekiston, ham Italiya uchun muhim va foydali qadam bo‘ladi” – dedi vakil.

Uning so‘zlariga ko‘ra, Toshkentda qishloq xo‘jaligi sohasida kadrlar tayyorlash bo‘yicha kuchli va zamonaviy markaz faoliyat yuritmoqda. Hamkorlar – “Umana”, O‘zbekiston Qishloq xo‘jaligi vazirligi hamda Migratsiya agentligi bilan birgalikda amalga oshirayotgan ishlar yaxshi natijalar bermoqda. Birinchi mutaxassislar guruhi esa yaqin vaqtda Italiyaga yetib borishi kutilmoqda.

Dastur ishtirokchilari italyan tilini o‘rganmoqda, chunki ularga muloqot qilish va Italiyadagi hayotni tushunish kerak bo‘ladi.  Shuningdek, ular kasbiy tayyorgarlikdan o‘tmoqda.

Dastlab traktorlarni boshqaradigan mutaxassislar guruhidan boshlashga qaror qilingan. Biroq zamonaviy traktorlar oddiy texnika emas — bugungi kunda ular sun’iy yo‘ldosh tizimlari va raqamli yechimlar bilan ishlaydigan yuqori texnologik mashinalardir.

Zamonaviy qishloq xo‘jaligi tobora raqamlashmoqda va bo‘lajak mutaxassislar O‘zbekistondayoq kerakli bilimlarni olishmoqda. Ular Italiyaga kelib fermer xo‘jaliklarimizda ishlaganidan so‘ng yana-da yuqori malakaga ega bo‘ladi, deya ta’kidladi Luka Brondello .