Isitish tizimi qachon yoqiladi va harorat qanday boʻlishi kerak?

Kelasi hafta kutilayotgan sovuqlar oldidan Raqobat qoʻmitasi Oʻzbekiston aholisiga isitish mavsumi qoidalari va kommunal xizmatlar sifat talablarini eslatdi.

Qachon isitish yoqiladi?

Amaldagi qonunchilikka koʻra, turar-joy binolarida isitish mavsumi tashqi havoning oʻrtacha sutkalik harorati besh kun mobaynida 8 darajadan past saqlanganidan keyingi kuni boshlanadi. Mos ravishda, harorat ushbu chegaradan yuqori boʻlganda isitish oʻchiriladi.

Isitish mavsumini boshlash va yakunlash muddatlari hokimiyatlar tomonidan tasdiqlanadi. Aynan shu organlar ob-havo sharoitidan kelib chiqqan holda qaror qabul qiladi. Demak, Toshkent koʻp qavatli uylarida isitish tegishli qarorni hokim imzolagandan keyin paydo boʻladi.

Kvartiralarda harorat qanday boʻlishi kerak?

Isitish mavsumi davrida 1995 yilgacha qurilgan koʻp qavatli uylar kvartiralarida havo harorati 20 darajadan past boʻlmasligi kerak. Agar isitish tizimi rekonstruksiya qilinmagan boʻlsa, minimal ruxsat etilgan harorat 18 darajani tashkil qiladi. Raqobat qoʻmitasi alohida taʼkidlaydi: yashash xonalarida haroratning belgilangan meʼyordan pastga tushishiga yoʻl qoʻyilmaydi.

Issiq suvga qoʻyiladigan talablar

Suv olish nuqtalarda issiq suv harorati 50−75°C oraligʻida boʻlishi kerak. Shu bilan birga, taʼminotchi sanitariya meʼyorlari va qoidalarga amal qilishi, suvning epidemik xavfsizligini, organoleptik xususiyatlarini (taʼmi, hidi, shaffofligi) va inson salomatligiga zarar yetmasligini taʼminlashi shart.

Agar aholi harorat rejimi buzilishi yoki issiq suv sifati bilan bogʻliq muammolarga duch kelsa, isteʼmolchilar huquqlarini himoya qilish organlariga shikoyat bilan murojaat qilishlari mumkin.