Afgʻonistonda internetning oʻchirilishi Rossiya va Eron bilan maslahatlashilgan — OAV

Kobul fuqarosi boʻlgan Xalil Ehson internetni tiklanishi haqida shunday dedi: “Endi internet qaytdi, biz Islom Amirligini boshqa yopilishga yoʻl qoʻymaslikka chaqiramiz, chunki internet bugungi kunning asosiy zarurati”.

“Afganistan International” nashrining yozishicha, mamlakat yetakchisi Haybatulloh Ohunzoda Eron va Rossiya bilan maslahatlashgan holda internetni uzishga qaror qilgan. Shundan soʻng, Pokiston Afgʻonistondagi internet uzilishi sababli “Torxam” oʻtish joyini yopgan. BMT va inson huquqlari tashkilotlari esa “Tolibon” hukumatini zudlik bilan internetni qayta yoqishga chaqirgan.

“Internetdagi uzilish Afgʻonistonda bank, bojxona, valyuta ayirboshlash shoxobchalari va aviareyslarni toʻxtatib qoʻydi”, — deyiladi “Afganistan International” xabarida.

Siyosatshunos Suhrob Boʻronov oʻzining Telegram sahifasida yozishicha, Afgʻonistonda “Tolibon” hukumatining internetning butunlay toʻxtatish qarorini umuman diniy mezonlar bilan baholab boʻlmaydi.

“Bu aslida nafaqat vujudga kelayotgan oʻtkir ijtimoiy-siyosiy muammolarni yashirishga urinish, balki AQShning Bagram bazasiga oid bayonotlari ortidan qabul qilingan qaror boʻlgani tobora oydinlashmoqda”, — deya yozadi siyosatshunos.