Afg‘onistonda Eronga ketayotgan 5 muhojir sahroda halok bo‘ldi, 14 nafari bedarak yo‘qoldi

Afg‘onistonning Nimroz viloyatidagi sahroda Eronga noqonuniy yo‘llar orqali o‘tishga uringan 19 nafar yigitdan besh nafari halok bo‘lgani aniqlandi. Qolgan 14 nafar fuqaro esa hozircha bedarak yo’qolgan. Bu haqda Afg‘onistonning TOLOnews nashri yozdi.

Huquq-tartibot idoralari ma’lumotiga ko‘ra, ushbu guruh Helmand va Nimroz viloyatlari orqali Eronga noqonuniy ravishda o‘tishga harakat qilgan.

Ulardan besh nafari kuchli jazirama va suvsizlanish oqibatida halok bo‘lgan. Qolgan 14 kishining taqdiri esa hozircha noma’lum.

Qutqaruv va xavfsizlik kuchlari bedarak yo‘qolganlarni tirik yoki o’lik holda topish uchun qidiruv ishlarini davom ettirmoqda.

Hukumatdan ish o‘rinlari yaratish so‘ralmoqda

Nimrozlik fuqaro Ahmad Barakzay hukumatni yangi ish o‘rinlari yaratishga chaqirdi.

“Eronga viza olish imkonsiz, mamlakatda esa ish yo‘q. Shu sabab noqonuniy migratsiya avj oldi. Sahroda 20–30 kishi bedarak yo‘qolgan, ulardan uch yoki to‘rt nafarining jasadi allaqachon topilgan”, — dedi u.

Ayrim tahlilchilar hukumat noqonuniy migratsiyani kamaytirish uchun amaliy choralar ko‘rishi zarurligini ta’kidlamoqda.

Ularning fikricha, buning uchun mamlakatda yangi ish o‘rinlari yaratish va xorijda ishlashni istagan afg‘on fuqarolari uchun qonuniy migratsiya yo‘llarini yengillashtirish lozim.

Siyosatshunos Basir Ahmad Donishyor bu borada quyidagicha fikr bildirdi:

“Hukumat, avvalo, ish o‘rinlari yaratishi kerak. Agar buning imkoni bo‘lmasa, afg‘on ishchilarini boshqa davlatlarga qonuniy va xavfsiz yo‘llar bilan yuborish mexanizmini ishlab chiqishi zarur. Bu yana ko‘plab yoshlar va qimmatli inson resurslari qurbon bo’lishining oldini oladi”, — dedi u.

Afg‘onistonning janubi-g‘arbida joylashgan Nimroz viloyati Pokiston va Eronga noqonuniy migratsiya qilishga urinayotgan afg‘onlar foydalanadigan asosiy tranzit yo‘nalishlaridan biridir.