Britaniyada yoz faslida 3 081 ta namoyish boʻlib oʻtdi, koʻpchiligi — Falastinni qoʻllab-quvvatlash maqsadida oʻtkazildi

2025 yilning iyun, iyul va avgust oylarida Buyuk Britaniya hududida jami 3 081 ta namoyish tashkil etildi. Milliy politsiya rahbarlari kengashi (NPCC) xabariga koʻra, ularning asosiy qismi Falastinni qoʻllab-quvvatlash bilan bogʻliq boʻlgan.

NPCC maʼlumotiga koʻra, miting va aksiyalarning xavfsizligini taʼminlash hamda namoyishchilarga munosabat bildirish politsiya ishining katta qismini egallab olgan. Solishtirish uchun: 2024 yil yozida (oʻng qanotchi zoʻravonliklar keskin kuchaygan davrda) 2 942 ta aksiya oʻtkazilgan boʻlsa, 2023 yilda bu raqam atigi 928 ni tashkil etgan. Shunday qilib, ikki yil ichida namoyishlar soni uch baravardan koʻproq oshgan.

NPCC raisi Gevin Stivens namoyishlar koʻpayishi politsiyaga katta yuklama berganini qayd etdi. Uning aytishicha, jamiyatda keskinlik va boʻlinish kuchayib borayotganiga hamma, jumladan politsiya rahbarlari ham masʼuliyat bilan eʼtibor qaratishi zarur. 

«Har bir rahbar aholi oʻrtasidagi qarama-qarshilikni kuchaytirmaydigan, balki tinchlikka xizmat qiladigan choralarni koʻrishi kerak», — dedi u.

Stivensning taʼkidlashicha, bu aksiyalarning xavfsizligini taʼminlayotgan politsiya xodimlari kundalik vazifalarni bajaradigan oddiy xizmatchilar hisoblanadi. U Britaniyada «ommaviy fuqaroviy itoatsizlik xavfi haqidagi» daʼvolarni asossiz deb atadi, biroq 55% politsiyachilar jismoniy charchoqdan aziyat chekayotganini maʼlum qildi. 

Shu bilan birga, u namoyishlarning koʻpayishi moliyaviy bosimni ham kuchaytirayotganini taʼkidlab, qoʻshimcha resurslar ajratilmasa, jinoyatchilik darajasini pasaytirish boʻyicha rejalarga erishish qiyin boʻlishini ogohlantirdi.