Istanbul meri Imomogʻluga yangi ayblov qoʻyildi

«Anadolu» axborot agentligi maʼlumotlariga koʻra, u “siyosiy josuslik”da gumon qilinmoqda. Imomogʻluning oʻzi barcha ayblovlarni rad etgan.

Sud qaroriga koʻra, Imomogʻlu bilan birga «Tele1» telekanali bosh muharriri Merdan Yanardag va merning maslahatchisi hamda saylovoldi tashviqoti menejeri Nechati Oʻzkan ham hibsga olingan. Tergovda ular 2019 yilgi mahalliy saylovlarda firibgarlik orqali ustunlikka erishishni rejalashtirgani, ijtimoiy tarmoqlar va saylovchilarning elektron pochtalariga noqonuniy kirishga urinishgani aytiladi.

Prokurorlar ularni fuqarolarning shaxsiy maʼlumotlarini xorijiy razvedka idoralariga yetkazishda ayblamoqda.

«Soʻzju» gazetasi yozishicha, bu qaror iyul oyida josuslikda gumon qilinib hibsga olingan Husayn Gʻunning koʻrsatmalari asosida qabul qilingan. Tergov hujjatlariga koʻra, Gʻun Nechati Oʻzkan bilan aloqalarni saqlab qolgan va «Tele1» telekanali faoliyatiga taʼsir koʻrsatgan.

Ekrem Imomogʻlu mart oyida hibsga olingan, iyul oyida esa davlat amaldorini haqorat qilishda ayblanib, bir yilu sakkiz oylik qamoq jazosiga hukm qilingan edi. Unga qarshi korrupsiya ishi ham ochilgan.

Mart oyidan beri Turkiyada taxminan 500 nafar kishi hibsga olingan, ularning koʻpchiligi CHP aʼzolari boʻlib, oralarida Istanbul, Antaliya, Bursa, Chanoqqalʼa, Giresun va Trabzon shaharlari amaldorlari ham bor.