Истанбул мэри Имомоғлуга янги айблов қўйилди

«Анадолу» ахборот агентлиги маълумотларига кўра, у “сиёсий жосуслик”да гумон қилинмоқда. Имомоғлунинг ўзи барча айбловларни рад этган.

Суд қарорига кўра, Имомоғлу билан бирга «Теле1» телеканали бош муҳаррири Мердан Янардаг ва мэрнинг маслаҳатчиси ҳамда сайловолди ташвиқоти менежери Нечати Ўзкан ҳам ҳибсга олинган. Терговда улар 2019 йилги маҳаллий сайловларда фирибгарлик орқали устунликка эришишни режалаштиргани, ижтимоий тармоқлар ва сайловчиларнинг электрон почталарига ноқонуний киришга уринишгани айтилади.

Прокурорлар уларни фуқароларнинг шахсий маълумотларини хорижий разведка идораларига етказишда айбламоқда.

«Сўзжу» газетаси ёзишича, бу қарор июль ойида жосусликда гумон қилиниб ҳибсга олинган Ҳусайн Ғуннинг кўрсатмалари асосида қабул қилинган. Тергов ҳужжатларига кўра, Ғун Нечати Ўзкан билан алоқаларни сақлаб қолган ва «Теле1» телеканали фаолиятига таъсир кўрсатган.

Экрем Имомоғлу март ойида ҳибсга олинган, июль ойида эса давлат амалдорини ҳақорат қилишда айбланиб, бир йилу саккиз ойлик қамоқ жазосига ҳукм қилинган эди. Унга қарши коррупция иши ҳам очилган.

Март ойидан бери Туркияда тахминан 500 нафар киши ҳибсга олинган, уларнинг кўпчилиги CHP аъзолари бўлиб, ораларида Истанбул, Анталия, Бурса, Чаноққалъа, Гиресун ва Трабзон шаҳарлари амалдорлари ҳам бор.