Jeffri Epshteyn menga shantaj qilgan — Bill Geyts

Bill Geyts o‘zining xayriya jamg‘armasi uchun mablag‘ yig‘ish maqsadida marhum jinsiy jinoyatchi Jeffri Epshteyn bilan muloqotda bo‘lgan kezlarida uning jinoyatlari ko‘lamini to‘liq anglamaganini ma’lum qildi.

Shuningdek, Geytsning aytishicha, Epshteyn tomonidan sodir etilgan jinoiy xatti-harakatlarning birontasiga guvoh bo‘lmagan.

U o‘zining nikohdan tashqari munosabatlari yuzasidan Epshteynni shantaj qilganlikda aybladi.

“Epshteyn qayta aloqa o‘rnatishga majburlash uchun to‘qigan ko‘plab yolg‘onlariga qo‘shimcha ravishda, mening xiyonatlarim haqidagi ma’lumotlardan ham foydalanishga urinayotgan edi”, — degan Geyts.

Kongress AQSH Adliya vazirligining Epshteyn ishini qanday yuritganini o‘rganmoqda. Milliarderning ko‘rsatmalari nochor oilalardagi ayol-qizlarni tuzog‘iga ilintirgan jinsiy jinoyatchi bilan aloqalariga oid.

Adliya vazirligi e’lon qilgan hujjatlarga ko‘ra, Geyts va Epshteyn 2008-yili texnologiya milliarderining xayriya sa’y-harakatlarini kengaytirishni muhokama qilish uchun bir necha bor uchrashgan.

Hujjatlarda Geytsning yuzlari yashirilgan ayollar bilan tushgan suratlari ham bor. Geyts avvalroq Epshteyn bilan munosabatlari faqat xayriya bilan bog‘liq muhokamalar doirasida bo‘lganini va u bilan uchrashib xato qilganini ta’kidlagan.

Xayriya tashkiloti vakilining Reuters agentligiga ma’lum qilishicha, Geyts fevral oyida Gates jamg‘armasi xodimlari bilan bo‘lib o‘tgan yig‘ilishda “o‘z xatti-harakatlari uchun mas’uliyatni zimmasiga olgan”.

Geytsning Epshteyn bilan munosabatlari Gates jamg‘armasiga ham ta’sir o‘tkazdi. Adliya vazirligi tomonidan yanvar oyida oshkor qilingan elektron maktublarda Epshteyn va Gates jamg‘armasi xodimlari o‘rtasidagi yozishmalar ham mavjud.