Sudan va Janubiy Sudanda dron hujumi: 153 kishi halok bo'ldi

Sudan va Janubiy Sudan o‘rtasidagi bahsli Abyei mintaqasida joylashgan Amiet bozori yaqinida dron hujumi oqibatida kamida 153 kishi halok bo‘ldi. Zarbadan so‘ng yaqin atrofdagi yoqilg‘i omborida yong‘in yuzaga kelgan. Bu haqda Associated Press (AP) agentligi xabar berdi.

Abyei ma’muriyatining vaqtinchalik axborot vaziri Yohanna Akol Ngorning ma’lum qilishicha, hujum dushanba kuni, 19-oktabrda, Abyei shahrining shimolidagi Amiet bozorida sodir bo‘lgan. Uning so‘zlariga ko‘ra, yong‘in davom etgani sababli qurbonlar soni yana ortishi mumkin.

Sudan harbiy qo‘mondonligining yuqori martabali vakili armiya dron orqali zarba berganini tasdiqlagan. Uning aytishicha, nishon Janubiy Sudandan kelayotgan va «Tezkor qo‘llab-quvvatlash kuchlari»ga (RSF) yetkazilishi taxmin qilingan yoqilg‘i tashuvchi mashinalar bo‘lgan. Harbiy vakil halok bo‘lganlar RSF a’zolari va yoqilg‘i kontrabandasiga aloqador shaxslar ekanini bildirgan.

Biroq AP agentligi nishonlar va halok bo‘lgan shaxslarning kimligi haqidagi bu ma’lumotlarni mustaqil ravishda tasdiqlay olmagan.

BMT Bosh kotibi Amiet bozori va Todach yaqinidagi dron hujumlarini qoraladi. Tashkilot bayonotida ayollar va bolalarni ham o‘z ichiga olgan o‘nlab tinch aholi vakillari halok bo‘lgani, ko‘plab odamlar jarohatlangani aytildi. Hujumlarni kim amalga oshirgani BMT bayonotida ko‘rsatilmagan.

BMT ma’lumotiga ko‘ra, ko‘plab odamlar bedarak yo‘qolgan va qurbonlar soni ortishi mumkin. Abyei hududidagi BMT Muvaqqat xavfsizlik kuchlari (UNISFA) jabrlanganlarga shoshilinch tibbiy yordam ko‘rsatish, ularni evakuatsiya qilish va yong‘in tarqalishining oldini olish uchun tibbiyot xodimlari hamda maxsus guruhlarni safarbar qilgan.

«Chegara bilmas shifokorlar» xalqaro tashkiloti (MSF) ma’lum qilishicha, yaqin atrofdagi Ameth Bek shifoxonasiga 20 nafardan ortiq jarohatlangan kishi olib kelingan. Ular orasida ahvoli og‘ir bemorlar va kuyish jarohati olganlar ham bor.

Janubiy Sudan Tashqi ishlar vazirligi ham hujum uchun Sudan armiyasini aybladi. Vazirlik Sudan elchisini chaqirtirib, norozilik bildirgan va tinch aholi hayoti hamda mol-mulkiga xavf tug‘diruvchi harakatlarni to‘xtatishga chaqirgan.

Sudanda hukumat armiyasi va RSF o‘rtasidagi qurolli to‘qnashuvlar 2023-yil aprel oyidan beri davom etmoqda. Urush mamlakatning katta qismida vayronagarchiliklarga sabab bo‘lib, qo‘shni hududlar xavfsizligiga ham tahdid solmoqda.

Muallif: Hasanboy OCHUN