Kongo va Ugandada Ebola epidemiyasi tarqaldi

JSSTning ta’kidlashicha, Bundibugyo virusi keltirib chiqargan ushbu epidemiya pandemiya mezonlariga to‘g‘ri kelmaydi, biroq Kongo bilan quruqlik orqali chegaradosh mamlakatlarda kasallikning kengroq tarqalish xavfi yuqori.

Shanba holatiga ko‘ra, Kongoning Ituri provinsiyasidagi kamida uchta sog‘liqni saqlash punktida 80 ta o‘lim holati taxmin qilinmoqda, Shuningdek, hududda laboratoriya tekshiruvlarida tasdiqlangan 8 ta hamda infeksiyaga gumon qilinayotgan 246 ta kasallanish holati ro‘yxatga olingan.

M23 isyonchilarining bayonotida aytilishicha, Kongoning sharqiy qismidagi Goma shahrida bir holat tasdiqlangan.

Kongo Sog‘liqni saqlash vazirligi juma kuni mamlakatning sharqiy viloyatida boshlangan yangi epidemiya oqibatida 80 kishi halok bo‘lganini ma’lum qilgan edi.

Bu mamlakatda Ebola ilk bor 1976-yilda aniqlangan. JSSTning ta’kidlashicha 17-epidemiya dastlabki namunalarining yuqori darajasi va gumon qilingan holatlar soni ortib borayotganini hisobga olsak, aslida xavf ancha kengroq ko‘lamda bo‘lishi mumkin.

Ushbu epidemiya "favqulodda" hisoblanadi, chunki virusga qarshi tasdiqlangan maxsus terapevtik vositalar yoki vaksinalar mavjud emas, deyiladi tashkilot xabarida.

Kongo Demokratik Respublikasi va Ugandadagi ushbu epidemiyaning avj olishi boshqa mamlakatlar uchun ham xavf tug‘diradi, chunki kasallikning xalqaro miqyosda tarqalishi bilan bog‘liq ba’zi holatlar allaqachon qayd etilgan.

Juma va shanba kunlari Uganda poytaxti Kampalada Kongo Demokratik Respublikasidan kelgan shaxslar orasida laboratoriya tasdig‘ini topgan ikki holat qayd etilib, ulardan biri o‘lim bilan tugagan.