Конго ва Угандада Эбола эпидемияси тарқалди

ЖССТнинг таъкидлашича, Бундибугё вируси келтириб чиқарган ушбу эпидемия пандемия мезонларига тўғри келмайди, бироқ Конго билан қуруқлик орқали чегарадош мамлакатларда касалликнинг кенгроқ тарқалиш хавфи юқори.

Шанба ҳолатига кўра, Конгонинг Итури провинциясидаги камида учта соғлиқни сақлаш пунктида 80 та ўлим ҳолати тахмин қилинмоқда, Шунингдек, ҳудудда лаборатория текширувларида тасдиқланган 8 та ҳамда инфекцияда гумон қилинаётган 246 та касалланиш ҳолати рўйхатга олинган.

М23 исёнчиларининг баёнотида айтилишича, Конгонинг шарқий қисмидаги Гома шаҳрида бир ҳолат тасдиқланган.

Конго Соғлиқни сақлаш вазирлиги жума куни мамлакатнинг шарқий вилоятида бошланган янги эпидемия оқибатида 80 киши ҳалок бўлганини маълум қилган эди.

Бу мамлакатда Эбола илк бор 1976 йилда аниқланган. ЖССТнинг таъкидлашича 17-эпидемия дастлабки намуналарининг юқори даражаси ва гумон қилинган ҳолатлар сони ортиб бораётганини ҳисобга олсак, аслида хавф анча кенгроқ кўламда бўлиши мумкин.

Ушбу эпидемия "фавқулодда" ҳисобланади, чунки вирусга қарши тасдиқланган махсус терапевтик воситалар ёки вакциналар мавжуд эмас, дейилади ташкилот хабарида.

Конго Демократик Республикаси ва Угандадаги ушбу эпидемиянинг авж олиши бошқа мамлакатлар учун ҳам хавф туғдиради, чунки касалликнинг халқаро миқёсда тарқалиши билан боғлиқ баъзи ҳолатлар аллақачон қайд этилган.

Жума ва шанба кунлари Уганда пойтахти Кампалада Конго Демократик Республикасидан келган шахслар орасида лаборатория тасдиғини топган икки ҳолат қайд этилиб, улардан бири ўлим билан тугаган.