Niderlandiyaga qarashli kemada xantavirus tarqaldi

Hodisa kema Afrikaning g‘arbiy qirg‘oqlarida joylashgan Kabo-Verde orol-davlati yaqinida suzib ketayotgan vaqtda yuz bergan.

OAV xabarlariga ko‘ra, kema bundan uch hafta avval Argentinadan 150 nafar yo‘lovchi bilan yo‘lga chiqqan. Kabo-Verdega yetib kelgunga qadar Antarktida va boshqa bir qator hududlarda to‘xtab o‘tgan.

Niderlandiya Tashqi ishlar vazirligi vakili kemadagi ikki nafar niderlandiyalik yo‘lovchi vafot etganini tasdiqladi, biroq o‘lim sabablariga oid boshqa tafsilotlarni ochiqlamadi.

Jahon sog‘liqni saqlash tashkiloti (JSST) o‘zining X sahifasida ma’lum qilishicha, kasallangan yo‘lovchilardan biri hozirda Janubiy Afrikadagi shifoxonaning jonlantirish bo‘limida.

Sky News nashri Janubiy Afrika Sog‘liqni saqlash vazirligiga tayanib, og‘ir ahvoldagi ushbu bemor Britaniya fuqarosi ekanligini xabar qildi.

Hozirda mutaxassislar kemadagi kutilmagan vaziyatning aniq sabablarini surishtirmoqda.

JSST kasallik avj olishini o‘rganayotganini ma’lum qildi. Agentlikning xabar berishicha, laboratoriya tahlillari olti kishidan birida xantavirus borligini tasdiqlagan.

Oceanwide Expeditions kompaniyasining bildirishicha, Kabo-Verde rasmiylari tibbiy yordamga muhtoj yo‘lovchilarning qirg‘oqqa tushishiga ruxsat bermagan.

Niderlandiya hukumati esa kasallik alomatlari bo‘lgan ikki nafar yo‘lovchini hamda vafot etgan shaxsning jasadini vataniga qaytarish (repatriatsiya) choralarini ko‘ryapti.

Xantavirus kemiruvchilarning axlati va peshobi havoga ko‘tarilishi orqali tarqalishi mumkin — masalan, odamlar sichqonlar yashagan bostirmalarni supurganida bu holat kuzatiladi. JSSTning qayd etishicha, kamdan-kam hollarda virus odamdan odamga ham yuqishi mumkin.

Kasallik grippga o‘xshash alomatlar bilan boshlanib, keyinchalik yurak va o‘pka yetishmovchiligiga olib keladi. Kasallanganlarning taxminan 40 foizi vafot etadi.

Xantavirusni davolash uchun maxsus dori vositalari mavjud emas, shu sababli asosiy e’tibor quvvatlovchi terapiyaga qaratiladi; og‘ir holatlarda bemorlar o‘pkasi sun’iy shamollatish apparatlariga ulanadi.

Britaniya Tashqi ishlar vazirligi va Janubiy Afrika Sog‘liqni saqlash vazirligi hozircha holat bo‘yicha izoh bermadi.