Markaziy Osiyo va Armaniston nishonda: Turkiyadan qatʼiy javob

Uning bu bayonotlari xalqaro huquqni inkor etish va milliy xavfsizlikni bahona qilgan holda qoʻshni davlatlarga nisbatan tajovuzkor siyosat olib borish ehtimolini yaqqol namoyon etmoqda.

Xalqaro huquqni ochiq inkor etish

Solovyov oʻz chiqishlarida xalqaro huquqiy meʼyorlarga rioya qilish niyati yoʻqligini yashirmadi. Uning taʼkidlashicha, milliy xavfsizlik manfaatlari har qanday xalqaro qoidalardan ustun turadi.

«Biz tushuntirishimiz kerak: oʻyinlar tugadi. Xalqaro huquqqa ham, xalqaro tartibga ham tupurdik», — dedi u.

Shuningdek, u Ukrainda boshlangan harbiy harakatlar boshqa mintaqalarda ham takrorlanishi mumkinligini ochiq tan oldi:

«Agar milliy xavfsizligimiz sabab Ukraina hududida maxsus harbiy operatsiyani boshlagan boʻlsak, aynan shu mulohazalardan kelib chiqib, taʼsir doiramizning boshqa nuqtalarida ham nega uni boshlamasligimiz kerak?» — dedi Solovyov.

Geosiyosiy ustuvorliklar va mintaqaviy tahdidlar

Kreml propagandachisi Rossiya uchun «yaqin xorij» — avvalo Armaniston va Markaziy Osiyo davlatlari Suriya yoki Venesuela kabi uzoq hududlardan ancha muhim ekanini taʼkidladi. Uning fikricha, ushbu mintaqalarda taʼsirni yoʻqotish Rossiya uchun jiddiy strategik oqibatlarga olib kelishi mumkin.

«Venesueladagi voqealardan koʻra Armanistonda yuz berayotgan jarayonlar biz uchun ancha ogʻriqli. Armanistonni yoʻqotish — ulkan muammo», — dedi u.

Markaziy Osiyo haqida esa quyidagicha baho berdi:

«Osiyodagi, Oʻrta Osiyodagi, ular aytganidek, Markaziy Osiyodagi muammolar biz uchun katta falokatga aylanishi mumkin. Shu sababli maqsad va vazifalarimizni aniq belgilab olishimiz shart», — deya taʼkidladi Solovyov.

Zoʻravonlikka ochiq daʼvatlar

Solovyov Rossiyaning Ukrainadagi harakatlari «yetarlicha shafqatsiz emas» degan fikrni ilgari surib, boshqa hududlarda yanada «qonunsiz va shafqatsiz» usullarni qoʻllashni taklif qildi. U Rossiya manfaatlari doirasiga kiruvchi mamlakatlarda «har qanday hokimiyat boʻlishi mumkin, faqat antirussiy boʻlmasligi kerak», deya Armaniston va Gruziyani misol sifatida tilga oldi.

Shu bilan birga, u zarurat tugʻilsa, Venesuela prezidenti Nikolas Maduroni oʻgʻrilashga oʻxshash maxsus operatsiyani ham amalga oshirish mumkinligini aytdi. Solovyov bu fikrlarida Donald Trampning Grenlandiya va Venesuela haqidagi bahsli ritorikasiga ham ishora qildi.

Mintaqaviy javob va yangi ittifoqlar

Rossiyadan yangrayotgan bunday tahdidli bayonotlar fonida mintaqadagi boshqa kuchlar ham oʻz pozitsiyalarini ochiq bildirmoqda. Xususan, Turkiya prezidenti Rejep Tayyip Erdogʻon Turkiya va Ozarbayjon oʻrtasidagi strategik ittifoq mustahkam ekanini yana bir bor taʼkidladi.

«Ozarbayjonga qaratilgan har qanday tahdid Turkiyaga qaratilgan tahdid hisoblanadi», — dedi u.

Siyosatshunoslar fikricha, bu bayonot ramziy emas, balki mintaqadagi kuchlar muvozanati oʻzgarib borayotganini anglatuvchi aniq siyosiy signal hisoblanadi.

Vladimir Solovyovning bayonotlari Rossiyaning oʻz «taʼsir doirasi» deb bilgan hududlarda, jumladan Markaziy Osiyo va Armanistonda harbiy aralashuv ehtimolini istisno qilmayotganini koʻrsatadi. Bu esa xalqaro huquqni ochiq rad etish va milliy xavfsizlikni bahona qilib, qoʻshni davlatlar suverenitetiga tahdid solish demakdir.

Bunga javoban, Turkiyaning Ozarbayjonni qatʼiy qoʻllab-quvvatlashi mintaqada yangi geosiyosiy muvozanat shakllanayotganidan dalolat beradi. Bu jarayonlar mintaqaviy barqarorlik uchun jiddiy sinov boʻlib, kelgusida keskinlik kuchayishi ehtimolini oshirmoqda.