Марказий Осиё ва Арманистон нишонда: Туркиядан қатъий жавоб

Унинг бу баёнотлари халқаро ҳуқуқни инкор этиш ва миллий хавфсизликни баҳона қилган ҳолда қўшни давлатларга нисбатан тажовузкор сиёсат олиб бориш эҳтимолини яққол намоён этмоқда.

Халқаро ҳуқуқни очиқ инкор этиш

Соловьёв ўз чиқишларида халқаро ҳуқуқий меъёрларга риоя қилиш нияти йўқлигини яширмади. Унинг таъкидлашича, миллий хавфсизлик манфаатлари ҳар қандай халқаро қоидалардан устун туради.

«Биз тушунтиришимиз керак: ўйинлар тугади. Халқаро ҳуқуққа ҳам, халқаро тартибга ҳам тупурдик», — деди у.

Шунингдек, у Украинда бошланган ҳарбий ҳаракатлар бошқа минтақаларда ҳам такрорланиши мумкинлигини очиқ тан олди:

«Агар миллий хавфсизлигимиз сабаб Украина ҳудудида махсус ҳарбий операцияни бошлаган бўлсак, айнан шу мулоҳазалардан келиб чиқиб, таъсир доирамизнинг бошқа нуқталарида ҳам нега уни бошламаслигимиз керак?» — деди Соловьёв.

Геосиёсий устуворликлар ва минтақавий таҳдидлар

Кремль пропагандачиси Россия учун «яқин хориж» — аввало Арманистон ва Марказий Осиё давлатлари Сурия ёки Венесуэла каби узоқ ҳудудлардан анча муҳим эканини таъкидлади. Унинг фикрича, ушбу минтақаларда таъсирни йўқотиш Россия учун жиддий стратегик оқибатларга олиб келиши мумкин.

«Венесуэладаги воқеалардан кўра Арманистонда юз бераётган жараёнлар биз учун анча оғриқли. Арманистонни йўқотиш — улкан муаммо», — деди у.

Марказий Осиё ҳақида эса қуйидагича баҳо берди:

«Осиёдаги, Ўрта Осиёдаги, улар айтганидек, Марказий Осиёдаги муаммолар биз учун катта фалокатга айланиши мумкин. Шу сабабли мақсад ва вазифаларимизни аниқ белгилаб олишимиз шарт», — дея таъкидлади Соловьёв.

Зўравонликка очиқ даъватлар

Соловьёв Россиянинг Украинадаги ҳаракатлари «етарлича шафқатсиз эмас» деган фикрни илгари суриб, бошқа ҳудудларда янада «қонунсиз ва шафқатсиз» усулларни қўллашни таклиф қилди. У Россия манфаатлари доирасига кирувчи мамлакатларда «ҳар қандай ҳокимият бўлиши мумкин, фақат антируссий бўлмаслиги керак», дея Арманистон ва Грузияни мисол сифатида тилга олди.

Шу билан бирга, у зарурат туғилса, Венесуэла президенти Николас Мадурони ўғрилашга ўхшаш махсус операцияни ҳам амалга ошириш мумкинлигини айтди. Соловьёв бу фикрларида Доналд Трампнинг Гренландия ва Венесуэла ҳақидаги баҳсли риторикасига ҳам ишора қилди.

Минтақавий жавоб ва янги иттифоқлар

Россиядан янграётган бундай таҳдидли баёнотлар фонида минтақадаги бошқа кучлар ҳам ўз позицияларини очиқ билдирмоқда. Хусусан, Туркия президенти Режеп Таййип Эрдоғон Туркия ва Озарбайжон ўртасидаги стратегик иттифоқ мустаҳкам эканини яна бир бор таъкидлади.

«Озарбайжонга қаратилган ҳар қандай таҳдид Туркияга қаратилган таҳдид ҳисобланади», — деди у.

Сиёсатшунослар фикрича, бу баёнот рамзий эмас, балки минтақадаги кучлар мувозанати ўзгариб бораётганини англатувчи аниқ сиёсий сигнал ҳисобланади.

Владимир Соловьёвнинг баёнотлари Россиянинг ўз «таъсир доираси» деб билган ҳудудларда, жумладан Марказий Осиё ва Арманистонда ҳарбий аралашув эҳтимолини истисно қилмаётганини кўрсатади. Бу эса халқаро ҳуқуқни очиқ рад этиш ва миллий хавфсизликни баҳона қилиб, қўшни давлатлар суверенитетига таҳдид солиш демакдир.

Бунга жавобан, Туркиянинг Озарбайжонни қатъий қўллаб-қувватлаши минтақада янги геосиёсий мувозанат шаклланаётганидан далолат беради. Бу жараёнлар минтақавий барқарорлик учун жиддий синов бўлиб, келгусида кескинлик кучайиши эҳтимолини оширмоқда.