Saudiya Arabistoni ikki yangi alkogol doʻkonini ochadi — Reuters

Saudiya Arabistoni mamlakatdagi koʻp yillik toʻliq taqiq tizimini bosqichma-bosqich yumshatish doirasida ikki yangi alkogol doʻkonini ochishni rejalashtirmoqda.

Har ikki doʻkon 2026 yilda ish boshlashi kutilmoqda va ularda qatʼiy nazorat oʻrnatiladi. Bu tizim 2024 yil boshida Ar-Riyoddagi diplomatik kvartalda ochilgan maxsus doʻkon amaliyoti bilan bir xil tartibda boʻladi. U yerda ham alkogol faqat musulmon boʻlmagan diplomatlar va maxsus maqomga ega oz sonli xorijliklarga sotiladi.

Reuters taʼkidlashicha, yangi doʻkonlar Saudiya Arabistoni fuqarolari uchun moʻljallanmagan boʻlib, ular yopiq majmua qoidalari asosida — roʻyxatdan oʻtish, kvotalar va nazorat qilingan xaridlar orqali faoliyat yuritadi.

Ushbu islohot mamlakat valiahd shahzodasi Muhammad ibn Salmonning «Vision 2030» dasturi doirasida amalga oshirilmoqda. Dastur xorijiy investitsiyalarni jalb qilish, malakali ekspatlar sonini oshirish va turizm hamda koʻngilochar sohalarni qoʻllab-quvvatlashga qaratilgan.

Rasmiylar agentlikka bildirishicha, alkogolga cheklangan va nazoratdagi ruxsatnomani kengaytirishdan maqsad — noqonuniy savdo va diplomatik kontrabandani kamaytirishdir. Shu bilan birga mamlakatda umumiy alkogol taqiqlari saqlab qolinadi.

Saudiya Arabistonida musulmonlarga alkogol sotish, saqlash va isteʼmol qilish 1952 yildagi ommaviy mojarodan soʻng joriy qilingan toʻliq taqiq doirasida man etiladi. Qoida shariat qonunlariga asoslanadi va mamlakat jinoyat kodeksi boʻyicha jarima, qamoq, chet elliklar uchun deportatsiya kabi jazolarni nazarda tutadi.