Sergey Mironov: "Til bilmaslikni bahona qilib davlatdan chiqarib yuborish — bu haqiqiy fashizm"

«Spravedlivaya Rossiya — Za pravdu» fraksiyasi rahbari Sergey Mironov Latviya tomonidan rossiyaliklarning deportatsiya qilinishi va Rossiyada migrantlarni chiqarib yuborish oʻrtasida farq borligini taʼkidladi.

Siyosatchining fikricha, Latviyadan deportatsiya qilinayotgan rusiyzabonlar migrant emas, balki oʻsha yerda oʻn yillab yashagan, baʼzilari SSSR davridan beri shu mamlakatda istiqomat qilib kelayotgan aholidir. Unga koʻra, til bilmaslikni bahona qilib, aslida odamlarni «prorossiya qarashlari» uchun chiqarib yuborish — «bu haqiqiy fashizm».

Rossiyadan migrantlarni chiqarib yuborish esa boshqa masala ekanini aytgan Mironov, bu xorijiy fuqarolarga nisbatan qonunlarga rioya qilmaslik va mahalliy urf-odatlarga moslashishni istamaslik bilan bogʻliqligini taʼkidladi.

Uning soʻzlariga koʻra, agar migrant qonun buzsa, nafaqat uning oʻzi, balki uning yaqin qarindoshlari ham deportatsiya qilinishi kerak. Shuningdek, Mironov Rossiyaga mehnat migrantlari faqat vaxta usulida kelishi, ularning oilalari esa mamlakatga kiritilmasligi lozimligini bildirdi.

Siyosatchining fikricha, bunday yondashuv muammolarni kamaytiradi va deportatsiya masalalari kamroq muhokamaga chiqadi.