Sun’iy intellekt poygasi: Hindiston Deep Tech uchun $25 milliard yo‘naltirmoqchi

Hindiston mamlakatdagi Deep Tech startaplarini qo‘llab-quvvatlash uchun 25 milliard dollar yo‘naltirishga tayyorgarlik ko‘rmoqda. Shu orqali mamlakat xalqaro texnologik poygada AQSh va Xitoydan ortda qolmaslikka hamda ilg‘or xorijiy texnologiyalarga qaramligini kamaytirishga urinmoqda.

Deep Tech – bu sun’iy intellekt, yarimo‘tkazgichlar, ilg‘or ishlab chiqarish, dronlar va kosmik texnologiyalar sohasidagi startaplar uchun ishlatiladigan keng atama.

Hindiston oxirgi o‘n yil ichida Deep Tech sohasiga jami 11,6 milliard dollar sarmoya kiritgan. Bu haqda Hindiston venchur va muqobil kapital assotsiatsiyasi (IVCA) prezidenti Rajat Tandon CNBC nashriga ma’lum qildi.

Ammo hozirda birgina hukumatning o‘zi 11 milliard dollar sarmoya kiritish majburiyatini oldi, unga yana venchur kapital va xususiy sarmoya fondlari menejerlari tomonidan ham teng miqdorda sarmoya kiritiladi, dedi u.

“Yana 3 yoki 4 milliard dollar qo‘shiladi. Natijada Deep Tech investitsiyalariga sarflash uchun 25 milliard dollar mavjud bo‘ladi”, –  dedi Tandon.

Ekspertlar fikricha, mazkur moliyalashtirishning kuchayishiga sabab – geosiyosiy keskinlik ortib borayotgan bir paytda hukumat ilg‘or texnologiyalar “nihoyatda muhim” ekanini anglab yetgani bilan bog‘liq.

Hozirda Xitoy va AQSH global sun’iy intellekt poygasida yetakchi. Hindistonda Xitoy texnologiyalariga shubha bilan qarash mavjud, ammo Vashingtonning texnologiyalar eksportiga qo‘ygan cheklovlari uni ham ishonchsiz qilmoqda.

“AQSH tariflari aslida Deep Tech segmentiga juda katta yordam beradi,” – dedi Crane Venture Partners boshqaruvchi direktori Anandamoy Roychudxuri.

Uning qo‘shimcha qilishicha, “muhim texnologiyalardan istalgan paytda uzilib qolish mumkin”, degan xavotir tufayli Hindiston mahalliy Deep Tech kompaniyalarini rivojlantiradi.

Bu xavotirlarning ayrimlari iyun oyining boshida tasdig‘ini topdi. O‘shanda Anthropic AQSh hukumatining ko‘rsatmasiga binoan xorijiy fuqarolar uchun o‘zining yangi Fable 5 va Mythos 5 modellaridan foydalanish imkoniyatini chekladi.

SuperReturn Asia tadbirida yig‘ilgan startaplarni moliyalashtirish bo‘yicha mutaxassislar Hindistonning Deep Tech kompaniyalari hali rivojlanishning dastlabki bosqichida ekanini, biroq mamlakatdagi g‘oyalar va iqtidorli mutaxassislarning salohiyati tufayli ushbu ekotizim kelajakda global miqyosdagi yetakchi kompaniyalarni yaratishga qodirligini ta’kidladi.

Avgust oyida IVCA e’lon qilgan hisobotda mamlakatdagi 100 ta fond o‘rtasida o‘tkazilgan so‘rov natijalari keltirilgan. Unga ko‘ra, Hindistondagi har 10 ta fondning 9 tasi Deep Tech startaplariga kapital yo‘naltirmoqda.

2025-yilda mazkur sektorga 3 milliard dollar sarmoya kiritilgan. Bu tarixdagi eng yuqori ko‘rsatkich.

Biroq hisobot Hindiston va AQSh o‘rtasidagi tafovutni ham ko‘rsatmoqda: AQShda shu davrda Deep Tech kompaniyalariga 136 milliard dollar mablag‘ yo‘naltirilgan.

Hindistonning Deep Tech startaplari duch kelayotgan asosiy kamchiliklardan biri – uzoq vaqt talab qiladigan va keng miqyosdagi innovatsion loyihalar uchun zarur mahalliy kapitalning yetishmasligidir.

Bugungi kunda Hindistonda 10 million dollardan yuqori miqdordagi sarmoya uchun chek yozishga qodir odamlar atigi 2 foizni tashkil qiladi.