Janubiy Koreyada 26 nafar oʻzbekistonlik jarimaga tortildi

Maʼlum qilinishicha, Koreya Adliya vazirligi, Politsiya, Dengiz politsiyasi, Bandlik vazirligi hamda Transport vazirliklari hamkorligida 12 dekabrgacha davom etadigan qoʻshma reydlar oʻtkazilmoqda. U noqonuniy yashovchilar, mahalliy aholining ish oʻrinlarini egallayotgan xorijliklar, vositachilar hamda axloq meʼyorlariga zid faoliyat yurituvchilarni aniqlashga qaratilgan.

APEC-2025 Koreya sammiti arafasida Gyonju shahri va unga yaqin hududlarda nazorat yanada kuchaytirilmoqda. Qonunbuzarlik aniqlansa, jarima, deportatsiya va Koreyaga kirish taqiqlari qoʻllanadi.

Agentlikning bildirishicha, 2025 yilning shu davriga qadar Koreya Respublikasida Ye-9 vizasi asosida mehnat faoliyatini amalga oshirish davrida qonunchilik talablarini buzib, noqonuniy maqomga tushgan 26 nafar Oʻzbekiston fuqarosiga nisbatan Migratsiya agentligi tomonidan uch tomonlama shartnoma asosida (noqonuniy yurgan har bir oy uchun 2000 AQSh dollari miqdorida) jarima choralari qoʻllanilgan.

Janubiy Koreyaning Ye-9 vizasi — malakasiz ishlarga moʻljallangan mehnat vizasi boʻlib, asosan qishloq xoʻjaligi, qurilish, ishlab chiqarish, baliqchilik va xizmat koʻrsatish sohalarida ishlash istagidagi xorijiy fuqarolarga beriladi. 

Ushbu viza odatda 3 yilgacha beriladi. Ayrim hollarda ish shartnomasi uzaytirilsa, yana 1 yil 10 oygacha choʻzilishi mumkin. Ye-9 vizasi boʻyicha ishchilar faqat ruxsat etilgan ish joyida ishlashi mumkin.