Жанубий Кореяда 26 нафар ўзбекистонлик жаримага тортилди

Маълум қилинишича, Корея Адлия вазирлиги, Полиция, Денгиз полицияси, Бандлик вазирлиги ҳамда Транспорт вазирликлари ҳамкорлигида 12 декабргача давом этадиган қўшма рейдлар ўтказилмоқда. У ноқонуний яшовчилар, маҳаллий аҳолининг иш ўринларини эгаллаётган хорижликлар, воситачилар ҳамда ахлоқ меъёрларига зид фаолият юритувчиларни аниқлашга қаратилган.

APEC-2025 Корея саммити арафасида Гёнжу шаҳри ва унга яқин ҳудудларда назорат янада кучайтирилмоқда. Қонунбузарлик аниқланса, жарима, депортация ва Кореяга кириш тақиқлари қўлланади.

Агентликнинг билдиришича, 2025 йилнинг шу даврига қадар Корея Республикасида Е-9 визаси асосида меҳнат фаолиятини амалга ошириш даврида қонунчилик талабларини бузиб, ноқонуний мақомга тушган 26 нафар Ўзбекистон фуқаросига нисбатан Миграция агентлиги томонидан уч томонлама шартнома асосида (ноқонуний юрган ҳар бир ой учун 2000 АҚШ доллари миқдорида) жарима чоралари қўлланилган.

Жанубий Кореянинг Е-9 визаси — малакасиз ишларга мўлжалланган меҳнат визаси бўлиб, асосан қишлоқ хўжалиги, қурилиш, ишлаб чиқариш, балиқчилик ва хизмат кўрсатиш соҳаларида ишлаш истагидаги хорижий фуқароларга берилади. 

Ушбу виза одатда 3 йилгача берилади. Айрим ҳолларда иш шартномаси узайтирилса, яна 1 йил 10 ойгача чўзилиши мумкин. Е-9 визаси бўйича ишчилар фақат рухсат этилган иш жойида ишлаши мумкин.