JCh-2026: Osiyo qitʼasi saralashining guruh oʻyinlari boshlanmoqda

Terma jamoaning birinchi oʻyini 5 sentabr kuni "Bunyodkor" stadionida KXDRga qarshi boʻlib oʻtadi. Oʻyin Toshkent vaqti bilan soat 19:00 da boshlanadi. 

Ikkinchi oʻyin esa 10 sentabr kuni Qirgʻiziston terma jamoasi bilan Bishkekdagi "Dolen Umrzaqov" stadionida boʻlib oʻtadi. Mazkur oʻyin Toshkent vaqti bilan soat 20:00 da boshlanadi. Uchinchi turda azaliy raqib hisoblangan Eron terma jamoasi yana Toshkentda mehmon boʻladi. Oʻyin 10 oktabr kuni soat 19:00 da "Bunyodkor" stadionida boʻlib oʻtadi. 

Toʻrtinchi turda Birlashgan Arab Amirliklari sinovdan oʻtkaziladi. Bu oʻyin ham "Bunyodkor" stadionida oʻtishi rejalashtirilgan. Uchrashuv 15 oktabr kuni soat 19:00 da boshlanadi. Oxirgi beshinchi turda Oʻzbekiston terma jamoasi Qatarga qarshi maydonga tushadi. Bu bahs 14 noyabrda boʻlib oʻtadi. 

Ortda qolgan 5 ta turdan soʻng terma jamoalar biroz muddat dam oladi va mart oyidan boshlab javob uchrashuvlari tashkil etiladi. AQSh, Kanada va Meksika mezbonligida oʻtadigan 2026 yilgi Jahon chempionatiga Osiyo qitʼasi uchun 6 ta litsenziya berilgan boʻlib, soʻnggi bosqichning guruh oʻyinlarida oʻz guruhida birinchi va ikkinchi oʻrinni egallagan terma jamoalar toʻgʻridan-toʻgʻri yoʻllanmani qoʻlga kiritadi. Eng yaxshi uchinchi oʻrinni qoʻlga kiritgan ikki terma jamoa saralash bahslarida ishtirok etadi.

Eslatib oʻtamiz, "A" guruhidan tashqari qolgan "B" va "C" guruhlarida ham oʻyinlar oʻtkaziladi. Saralash bahslarining "B" guruhidan Koreya, Iroq, Iordaniya, Ummon, Falastin va Quvayt terma jamoalari oʻrin olgan boʻlsa, "C" guruhida Yaponiya, Avstraliya, Bahrayn, Xitoy, Indoneziya va Saudiya Arabistoni terma jamoalari bahslashadi.