Abduqodir Husanov Osiyoning 2025 yildagi eng yaxshi yosh futbolchisi deb topildi

Qayd etilishicha, oʻtgan yil 21 yoshli futbolchi faoliyatida tarixiy ahamiyatga ega boʻldi. Xususan, yanvar oyida Husanov «Manchester Siti» safiga qoʻshilib, Angliya Premer-ligasida debyut qilgan ilk oʻzbekistonlik futbolchi sifatida tarixga kirdi.

Iyun oyida esa u Oʻzbekiston milliy terma jamoasi bilan birga jamoani Jahon chempionatiga olib chiqishga munosib hissa qoʻshdi. Joriy mavsumda markaziy himoyachi «shaharliklar» safida toʻqqizta uchrashuvda maydonga tushgan.

«Goalpost» tomonidan oʻtkazilgan soʻrovnoma natijalariga koʻra, Abduqodir Husanov Osiyoning qator istiqbolli yosh futbolchilarini ortda qoldirdi. Ular orasida:

— Abbosbek Fayzullayev («Istanbul Bashakshehir», Oʻzbekiston);
— Nestori Irankunda («Uotford», Avstraliya);
— Marselino Ferdinand («Oksford Yunayted», Indoneziya);
— Li Xan Bom («Midtyulland», Janubiy Koreya);
— Ali Jasim («Komo» / «An-Najma», Iroq).

Shuningdek, Abduqodir Husanov «The Athletic» nashri tuzgan dunyoning eng kuchli 100 nafar futbolchisi reytingida 86-oʻrinni egalladi.